శ్రీ సాయి ప్రసన్న హైస్కూల్లో ఘనంగా బాలల దినోత్సవ వేడుకలు
విభిన్న వేషధారణలు, చిట్టి చిట్టి మాటలతో అలరించిన చిన్నారులు..
బోధన్ పట్టణంలోని శ్రీ సాయి ప్రసన్న హైస్కూల్లో బాలల దినోత్సవ వేడుకలను ఘనంగా నిర్వహించారు. ఈ సందర్భంగా పాఠశాల విద్యార్థినీ విద్యార్థులు బుడిబుడి అడుగులు, చిట్టి చిట్టి మాటలతో విభిన్న వేషధారణల్లో అందంగా ముస్తాబై అందరినీ ఆకట్టుకున్నారు.
ముందుగా బాలల దినోత్సవాన్ని పురస్కరించుకుని పండిట్ జవహర్లాల్ నెహ్రూ చిత్రపటానికి పూలమాలలు వేసి ఘనంగా నివాళులర్పించారు. అనంతరం చిన్నారులు వివిధ ఆకృతుల్లో రూపొందించిన చిత్రాలు, కళాకృతులను ప్రదర్శించారు. అంతేకాకుండా తమ చిట్టి చేతులతో తయారుచేసిన విభిన్న వంటకాలను ప్రదర్శించి, వాటి తయారీ విధానాన్ని తమకు వచ్చిన మాటల్లో వివరించారు. చిన్నారుల ప్రదర్శనలను చూసిన తల్లిదండ్రులు, పెద్దలు, ఉపాధ్యాయ సిబ్బంది ఎంతో ఆనందం వ్యక్తం చేశారు.
ఈ సందర్భంగా పాఠశాల కరస్పాండెంట్ జయప్రకాష్ మాట్లాడుతూ పండిట్ జవహర్లాల్ నెహ్రూ జీవిత చరిత్ర, ఆయన బాల్యం, పిల్లలపై ఆయనకున్న ప్రేమాభిమానాల గురించి విద్యార్థులకు వివరించారు. ప్రతి చిన్నారి తన బాల్యాన్ని ఆనందంగా ఆస్వాదించాలని, బాలల దినోత్సవ వేడుకలు పిల్లల్లో ఆనందంతో పాటు సృజనాత్మకతను పెంపొందిస్తాయని తెలిపారు.
పిల్లలు దైవంతో సమానమని, ప్రతి ఒక్కరూ తమ బాల్యాన్ని సంతోషంగా గడిపేలా తల్లిదండ్రులు, ఉపాధ్యాయులు ప్రోత్సహించాలని అన్నారు. బాల్యాన్ని ఆనందంగా ఆస్వాదించినప్పుడే పిల్లల్లో మేధోసంపత్తి, సృజనాత్మకత పెరుగుతాయని పేర్కొన్నారు.
ఈ కార్యక్రమంలో పాఠశాల కరస్పాండెంట్ జయప్రకాష్, ఉపాధ్యాయ సిబ్బంది, విద్యార్థుల తల్లిదండ్రులు తదితరులు పాల్గొన్నారు.

























