తండ్రి జ్ఞాపకార్థం గ్రామానికి స్వర్గరథం విరాళం
కోనాపూర్ గ్రామ ఉప సర్పంచ్ మోర్తాడ్ ఉదయ్ ఔదార్యం గ్రామస్థుల హర్షం…
త్రిశూల్ న్యూస్ కమ్మర్‌పల్లి మండల్ రిపోర్టర్ గుర్రం నరేష్
నిజామాబాద్ జిల్లా : కమ్మర్‌పల్లి మండలంలోని కోనాపూర్ గ్రామ ఉప సర్పంచ్ మోర్తాడ్ ఉదయ్ శుక్రవారం తన జన్మదినాన్ని పురస్కరించుకుని సేవా కార్యక్రమానికి శ్రీకారం చుట్టారు.తన తండ్రి మోర్తాడ్ కాంతారావు జ్ఞాపకార్థం గ్రామ ప్రజల సౌకర్యార్థం స్వర్గరథాన్ని విరాళంగా అందజేశారు.
తండ్రి జ్ఞాపకాలను చిరస్థాయిగా నిలిపేందుకు,గ్రామ ప్రజలకు అవసరమైన సమయంలో ఉపయోగపడాలనే ఉద్దేశంతో స్వర్గరథాన్ని అందించడం అభినందనీయమని గ్రామస్థులు హర్షం వ్యక్తం చేశారు.జన్మదిన వేడుకలను ఆడంబరాలకు దూరంగా ఉంచి, సమాజానికి ఉపయోగపడే సేవా కార్యక్రమం చేపట్టడం ఆదర్శనీయమని పలువురు కొనియాడారు. ఈ కార్యక్రమంలో గ్రామ సర్పంచ్ రిక్కల అరుణ్ రెడ్డి, గ్రామపంచాయతీ వార్డు సభ్యులు,గ్రామ అభివృద్ధి కమిటీ అధ్యక్షులు,ఉపాధ్యక్షులు, గ్రామ కమిటీ సభ్యులు తదితరులు పాల్గొన్నారు.
