శ్రద్ధానందుడి జీవితం అందరికీ ఆదర్శం
హిందువుల ఐక్యతకు విశేష కృషి చేసిన మహానుభావుడు స్వామి శ్రద్ధానందుడు: అర్బన్ ఎమ్మెల్యే ధన్పాల్ సూర్యనారాయణ…
ఇందూరు: స్వామి శ్రద్ధానందుడి జీవితం ప్రతి ఒక్కరికీ ఆదర్శప్రాయమని అర్బన్ ఎమ్మెల్యే ధన్పాల్ సూర్యనారాయణ అన్నారు. స్వామి శ్రద్ధానందుడు స్వయంగా రచించిన “కళ్యాణ మార్గ పథికుడు” గ్రంథం తెలుగు అనువాద పుస్తకాన్ని ఆదివారం నగరంలోని ఆర్యసమాజంలో ఆయన ఆవిష్కరించారు.
ఈ సందర్భంగా ఎమ్మెల్యే మాట్లాడుతూ.. స్వామి దయానంద సరస్వతి ప్రభావంతో ఆర్యసమాజంలో చేరిన స్వామి శ్రద్ధానందుడు అనేక సామాజిక సంస్కరణలకు శ్రీకారం చుట్టారని తెలిపారు. తన జీవితాన్ని దేశం, ధర్మం, సమాజ సేవకు అంకితం చేసిన మహానుభావుడని కొనియాడారు. ముఖ్యంగా హిందూ సమాజ ఐక్యత కోసం విశేషంగా కృషి చేశారని, ప్రజల్లో జాతీయ చైతన్యం, స్వాభిమానం పెంపొందించారని గుర్తుచేశారు.
స్వామి శ్రద్ధానందుడి స్ఫూర్తితో ఇందూరులోని ఓ ప్రాంతానికి ‘శ్రద్ధానంద్ గంజ్’ అని నామకరణం చేయడం ఎంతో గర్వకారణమని అన్నారు. స్వామి రచించిన గ్రంథాన్ని తెలుగులోకి అనువదించిన మర్రి కృష్ణారెడ్డికి ఎమ్మెల్యే ప్రత్యేక ధన్యవాదాలు తెలిపారు.
ఈ కార్యక్రమంలో ఆర్యసమాజ్ అధ్యక్షుడు విజయ్, ఉపాధ్యక్షుడు శ్రావణ్, మంత్రి తిరుమల శ్రీనివాస్, ఆచార్య ప్రణవ కుమార్, పండిత వేదమిత్ర తదితరులు పాల్గొన్నారు.

























