ప్రభుత్వ స్థలంలో ఆక్రమణల తొలగింపు
ప్రభుత్వ భూములు కబ్జా చేస్తే కఠిన చర్యలు: కలెక్టర్ ఇళా త్రిపాఠి…
నిజామాబాద్, అక్టోబర్ 15: నిజామాబాద్ జిల్లా కేంద్రంలో ప్రభుత్వ భూముల ఆక్రమణలపై రెవెన్యూ అధికారులు చర్యలు చేపట్టారు. కలెక్టర్ ఇళా త్రిపాఠి ఆదేశాల మేరకు నగరంలోని ముజాహిద్ నగర్ ప్రాంతంలో ప్రభుత్వ భూమిలో జరిగిన ఆక్రమణలను తొలగించారు.
ముజాహిద్ నగర్‌లోని సర్వే నంబర్ 2545లో మొత్తం 18 ఎకరాల ప్రభుత్వ భూమి ఉంది. ఇందులో 13 గుంటల భూమి ఆక్రమణకు గురైనట్లు అధికారులు గుర్తించారు. దీంతో గురువారం రెవెన్యూ అధికారులు క్షేత్రస్థాయిలో పరిశీలన చేపట్టి, సర్వే నిర్వహించి ఆక్రమణలను నిర్ధారించారు. అనంతరం రెవెన్యూ, నగరపాలక సంస్థ అధికారుల సమక్షంలో జేసీబీల సహాయంతో ఆక్రమణలను తొలగించారు.
ఈ సందర్భంగా కలెక్టర్ ఇళా త్రిపాఠి మాట్లాడుతూ.. ప్రభుత్వ భూముల ఆక్రమణలను ఎంతమాత్రం ఉపేక్షించబోమని స్పష్టం చేశారు. ప్రభుత్వ స్థలాలను ఆక్రమించే వారిపై కఠిన చర్యలు తీసుకుంటామని హెచ్చరించారు. ప్రభుత్వ భూములు అన్యాక్రాంతం కాకుండా అధికారులు పటిష్ఠమైన చర్యలు చేపట్టాలని ఆదేశించారు.
ప్రభుత్వ స్థలాల పరిరక్షణ కోసం అవసరమైన చోట ఫెన్సింగ్ ఏర్పాటు చేయాలని, ఎక్కడైనా ఆక్రమణలు జరిగినట్లు గుర్తిస్తే తక్షణమే వాటిని తొలగించి, బాధ్యులపై చట్టపరమైన చర్యలు తీసుకోవాలని అధికారులకు సూచించారు.
