ప్రతి నిమిషం కీలకమే.. స్ట్రోక్‌లో ఆలస్యం చేస్తే శాశ్వత వైకల్యం!
బీపీ, షుగర్‌ వ్యాధిగ్రస్తులు మరింత అప్రమత్తంగా ఉండాలి
మెడికవర్‌ హాస్పిటల్స్‌ ప్రముఖ న్యూరాలజీ వైద్య నిపుణుడు డాక్టర్‌ మోసిన్‌…
త్రిశూల్ న్యూస్ రిపోర్టర్ ప్రభాకర్
నిజామాబాద్: బ్రెయిన్‌ స్ట్రోక్‌ లక్షణాలను ఏమాత్రం నిర్లక్ష్యం చేయవద్దని మెడికవర్‌ హాస్పిటల్స్‌ ప్రముఖ న్యూరాలజీ వైద్య నిపుణుడు డాక్టర్‌ మోసిన్‌ సూచించారు. ప్రపంచ స్ట్రోక్‌ దినోత్సవం సందర్భంగా స్ట్రోక్‌ లక్షణాలు, చికిత్స, నివారణ చర్యలపై ఆయన అవగాహన కల్పించారు. మెదడుకు రక్త సరఫరాలో అంతరాయం ఏర్పడినా, మెదడులో రక్తస్రావం జరిగినా ప్రాణాలకు ముప్పు వాటిల్లే ప్రమాదం ఉందని హెచ్చరించారు. స్ట్రోక్‌ లక్షణాలు కనిపించిన వెంటనే ఆసుపత్రికి చేరుకోవడం అత్యంత కీలకమని, చికిత్సలో ఆలస్యం మెదడుకు తీవ్రమైన నష్టం కలిగించి శాశ్వత పక్షవాతానికి దారితీయవచ్చని తెలిపారు.
ముఖం ఒకవైపు వాలిపోవడం, చేయి లేదా కాలు అకస్మాత్తుగా బలహీనపడటం, మాట తడబడటం, చూపులో మార్పులు రావడం వంటి లక్షణాలు కనిపిస్తే సాధారణ నీరసంగా భావించి నిర్లక్ష్యం చేయకూడదన్నారు. ముఖ్యంగా రాత్రి సమయంలో లక్షణాలు కనిపించినా ఉదయం వరకు వేచి చూడకుండా వెంటనే వైద్య సహాయం పొందాలని సూచించారు.
గోల్డెన్‌ అవర్‌.. ప్రతి నిమిషం విలువైనదే
స్ట్రోక్‌ వచ్చినప్పుడు సకాలంలో చికిత్స అందించడం ద్వారా మెదడుకు జరిగే నష్టాన్ని తగ్గించే అవకాశం ఉంటుందని డాక్టర్‌ మోసిన్‌ తెలిపారు. రక్తనాళంలో రక్తం గడ్డకట్టడం వల్ల వచ్చే ఇస్కీమిక్‌ స్ట్రోక్‌లో అర్హులైన రోగులకు నిర్ణీత సమయంలో థ్రాంబోలైటిక్‌ చికిత్స అందించడం ద్వారా రక్తప్రసరణను పునరుద్ధరించవచ్చన్నారు. కొందరు రోగులకు రక్తనాళంలో గడ్డను తొలగించే ప్రత్యేక చికిత్స అవసరమవుతుందని వివరించారు. అయితే, ఏ చికిత్స అందించాలనేది బ్రెయిన్‌ స్కాన్‌, లక్షణాలు ప్రారంభమైన సమయం, రోగి ఆరోగ్య పరిస్థితిని బట్టి వైద్యులు నిర్ణయిస్తారని పేర్కొన్నారు.
బీపీ, షుగర్‌ ఉన్నవారు అప్రమత్తంగా ఉండాలి
అధిక రక్తపోటు, మధుమేహం, అధిక కొలెస్ట్రాల్‌, ధూమపానం, అధిక మద్యపానం, కొన్ని గుండె సంబంధిత సమస్యలు స్ట్రోక్‌ ముప్పును పెంచుతాయని డాక్టర్‌ మోసిన్‌ తెలిపారు. ఈ సమస్యలను నియంత్రణలో ఉంచుకోవడంతో పాటు క్రమం తప్పకుండా ఆరోగ్య పరీక్షలు చేయించుకోవాలని, వైద్యుల సూచనల మేరకు మందులు వాడాలని సూచించారు. ఆరోగ్యకరమైన జీవనశైలిని అలవర్చుకోవడం ద్వారా స్ట్రోక్‌ ప్రమాదాన్ని తగ్గించుకోవచ్చన్నారు.
చికిత్సతో పాటు పునరావాసం కూడా ముఖ్యం
స్ట్రోక్‌ వచ్చిన తర్వాత ప్రాణాలను కాపాడటంతో పాటు రోగి తిరిగి సాధారణ జీవితం గడిపేలా చేయడం కూడా ముఖ్యమని డాక్టర్‌ మోసిన్‌ పేర్కొన్నారు. ఇందుకోసం రోగి ఆరోగ్య పరిస్థితికి అనుగుణంగా ఫిజియోథెరపీ, ఆక్యుపేషనల్‌ థెరపీ, అవసరమైన వారికి స్పీచ్‌ థెరపీ అందించడం ద్వారా కదలికలు, మాట, రోజువారీ పనులు చేసుకునే సామర్థ్యాన్ని మెరుగుపరచవచ్చన్నారు.
స్ట్రోక్‌ రోగులకు వారి ఆరోగ్య పరిస్థితికి అనుగుణంగా వైద్య చికిత్స, తదుపరి సంరక్షణ, పునరావాస సేవలు అందించడం ద్వారా మెరుగైన ఫలితాలు సాధించే అవకాశం ఉంటుందని తెలిపారు. స్ట్రోక్‌ విషయంలో ప్రతి నిమిషం విలువైనదని, లక్షణాలను గుర్తించిన వెంటనే ఆసుపత్రికి చేరుకోవడమే ప్రాణాలను కాపాడటంతో పాటు శాశ్వత వైకల్య తీవ్రతను తగ్గించడంలో కీలకమని డాక్టర్‌ మోసిన్‌ స్పష్టం చేశారు.
