చాముండేశ్వరి ఆలయంలో వైభవంగా నవరాత్రి ఉత్సవాలు!
భారీ సంఖ్యలో పాల్గొంటున్న భక్తులు.. వేద మంత్రోచ్చారణలతో మార్మోగుతున్న ఆలయం…
త్రిశూల్ న్యూస్ రిపోర్టర్ గడిల లింగం
దోమకొండ: కామారెడ్డి జిల్లా దోమకొండ మండల కేంద్రంలోని చాముండేశ్వరి దేవి ఆలయంలో అమ్మవారి నవరాత్రి ఉత్సవాలు వైభవంగా కొనసాగుతున్నాయి. ఉత్సవాలను పురస్కరించుకుని ఆలయాన్ని అందంగా అలంకరించారు. తొమ్మిది రోజుల పాటు అమ్మవారికి ప్రత్యేక పూజలు, అర్చనలు నిర్వహిస్తున్నారు.
అర్చకులు, పండితులు వేద మంత్రోచ్చారణల మధ్య అమ్మవారికి విశేష పూజలు నిర్వహిస్తుండటంతో ఆలయ ప్రాంగణం ఆధ్యాత్మిక శోభను సంతరించుకుంది. భక్తి పాటలు, వేద మంత్రాల నడుమ ఆలయ పరిసరాలు భక్తిభావంతో మార్మోగుతున్నాయి.
నవరాత్రి ఉత్సవాల్లో భాగంగా అమ్మవారిని దర్శించుకునేందుకు మండల కేంద్రంతో పాటు పరిసర గ్రామాల నుంచి భక్తులు పెద్ద సంఖ్యలో తరలివస్తున్నారు. భక్తులు అమ్మవారిని దర్శించుకుని ప్రత్యేక పూజలు నిర్వహిస్తూ, తమ మొక్కులను చెల్లించుకుంటున్నారు.
నవరాత్రి ఉత్సవాల సందర్భంగా ఆలయంలో నెలకొన్న ఆధ్యాత్మిక వాతావరణం భక్తులను విశేషంగా ఆకట్టుకుంటోంది. ఉత్సవాలను అంగరంగ వైభవంగా నిర్వహిస్తుండటంతో భక్తులు ఆనందం వ్యక్తం చేస్తున్నారు.
