అంగరంగ వైభవంగా నిజామాబాద్‌లో మాదిగ మహారాజుల శోభాయాత్ర
ముఖ్య అతిథిగా పాల్గొన్న డా. విశారదన్ మహారాజ్…
త్రిశూల్ న్యూస్ రిపోర్టర్ గుర్రం నరేష్
నిజామాబాద్: నిజామాబాద్ జిల్లా కేంద్రంలో మాదిగ జాగృతి సంఘం (MJS) ఆధ్వర్యంలో నవంబర్ 1న మాదిగ మహారాజుల శోభాయాత్ర అంగరంగ వైభవంగా నిర్వహించారు. జిల్లాలోని వివిధ ప్రాంతాల నుంచి వేలాది మంది మాదిగ సామాజిక వర్గానికి చెందిన ప్రజలు పెద్ద సంఖ్యలో తరలివచ్చి ఈ శోభాయాత్రలో పాల్గొన్నారు.
డప్పు వాయిద్యాలు, డీజేలు, కోలాటాలు, సాంస్కృతిక కళాబృందాల ప్రదర్శనలు, ఆటపాటలతో శోభాయాత్ర ఉత్సాహభరితంగా సాగింది. బోర్గం నుంచి ప్రారంభమైన ఈ శోభాయాత్ర పులాంగ్, ఎల్లమ్మగుట్ట మీదుగా ఎన్టీఆర్ చౌరస్తాకు చేరుకుంది.
అనంతరం నిర్వహించిన రోడ్‌షోలో ముఖ్య అతిథిగా పాల్గొన్న డా. విశారదన్ మహారాజ్ మాట్లాడుతూ.. తెలంగాణ రాష్ట్రంలో మాదిగలు అత్యధిక జనాభా కలిగిన సామాజిక వర్గమని పేర్కొన్నారు. ఒకప్పుడు మహారాజులుగా జీవించిన మాదిగ జాతికి వేల సంవత్సరాల చారిత్రక నేపథ్యం, జంబూద్వీప రాజ్య చరిత్ర ఉన్నాయని అన్నారు. అయితే, చారిత్రక ఘనత కలిగిన మాదిగ జాతి నేడు అంటరానితనానికి గురై గ్రామాల చివరన జీవించాల్సిన పరిస్థితి ఏర్పడిందని ఆవేదన వ్యక్తం చేశారు.
మాదిగ జాతి తిరిగి ఆత్మగౌరవంతో, గౌరవప్రదమైన జీవితాన్ని గడిపేలా అంబేద్కర్ అందించిన రాజ్యాంగం, ప్రజాస్వామ్య మార్గాన్ని ఉపయోగించుకోవాలని పిలుపునిచ్చారు. తెలంగాణ రాష్ట్రాన్ని మాదిగలే పరిపాలించాలనే ఆకాంక్షను ఈ సందర్భంగా వ్యక్తం చేశారు.
మాదిగ జాతి ఆత్మగౌరవాన్ని కాపాడుకుంటూ స్వశక్తితో తమ హక్కుల కోసం పోరాడాలని, అదే సమయంలో ఇతర సామాజికంగా వెనుకబడిన వర్గాలు, కులాల హక్కుల పరిరక్షణకు కూడా మాదిగలు ఉద్యమించాలని డా. విశారదన్ మహారాజ్ పిలుపునిచ్చారు.
ఈ కార్యక్రమంలో MJS నాయకులు సుమన్, ప్రేమ్, మహిపాల్, నాగేశ్వర్, సంతోష్, రాజు, సాయినాథ్, భగేంద్ర, సుదర్శన్, మహేందర్‌తో పాటు మాదిగ విద్యావంతులు, ఉద్యోగులు, మహారాజులు, మహారాణులు పెద్ద సంఖ్యలో పాల్గొన్నారు.
