యువ సంకల్పంతోనే సమాజ వికాసం సాధ్యం: టూటా అధ్యక్షుడు డాక్టర్ ఎ. పున్నయ్య…
త్రిశూల్ న్యూస్ రిపోర్టర్ ప్రభాకర్
యువతలో సామాజిక బాధ్యత, నాయకత్వ లక్షణాలు, సేవా దృక్పథం పెంపొందినప్పుడే సమాజం అభివృద్ధి పథంలో ముందుకు సాగుతుందని తెలంగాణ యూనివర్సిటీ టీచర్స్ అసోసియేషన్ (టూటా) అధ్యక్షుడు డాక్టర్ ఎ. పున్నయ్య అన్నారు.
అంతర్జాతీయ విద్యార్థి దినోత్సవాన్ని పురస్కరించుకుని తెలంగాణ విశ్వవిద్యాలయం జాతీయ సేవా పథకం (ఎన్ఎస్ఎస్) యూనిట్-1 ఆధ్వర్యంలో “యువ సంకల్పం – సమాజ వికాసం” అనే నినాదంతో ప్రత్యేక కార్యక్రమాన్ని విశ్వవిద్యాలయ ఆర్ట్స్ కళాశాల సెమినార్ హాల్లో నిర్వహించారు.
ఈ కార్యక్రమానికి ముఖ్య అతిథిగా హాజరైన డాక్టర్ ఎ. పున్నయ్య మాట్లాడుతూ.. విద్యార్థులు కేవలం విద్యాభ్యాసానికే పరిమితం కాకుండా సామాజిక సమస్యలపై అవగాహన పెంపొందించుకోవాలని, వాటి పరిష్కారంలో చురుకైన పాత్ర పోషించాలని సూచించారు.
ప్రత్యేక ఆహ్వానితులుగా హాజరైన యూజీసీ వ్యవహారాల డీన్ డాక్టర్ పాత నాగరాజు మాట్లాడుతూ.. విద్యార్థి దశ నుంచే సేవాభావం, సామాజిక స్పృహ, బాధ్యతాయుతమైన ఆలోచనా విధానాన్ని అలవర్చుకోవాలని సూచించారు.
కార్యక్రమ నిర్వాహకులు, ఎన్ఎస్ఎస్ యూనిట్-1 ప్రోగ్రాం ఆఫీసర్ డాక్టర్ సీహెచ్ శ్రీనివాస్ మాట్లాడుతూ.. అంతర్జాతీయ విద్యార్థి దినోత్సవ ప్రాధాన్యతను వివరించారు. విద్యార్థుల ఆలోచనలు, ఆకాంక్షలు, హక్కులు, బాధ్యతలకు వేదిక కల్పించడంతో పాటు వారిలో నాయకత్వ లక్షణాలను ప్రోత్సహించడమే ఈ కార్యక్రమ ప్రధాన ఉద్దేశమని తెలిపారు. యువత సమాజంలో సానుకూల మార్పునకు చోదకశక్తిగా నిలవాలని ఆకాంక్షించారు.
ఈ సందర్భంగా విద్యార్థిని సౌందర్య ఆలపించిన గీతం అందరినీ ఆకట్టుకుంది. అనంతరం విద్యార్థులు అనిల్ కుమార్, స్వాతి, మనోహర్, నీరజ తదితరులు ప్రసంగిస్తూ విద్యార్థుల హక్కులు, బాధ్యతలు, సమాజంలో యువత పాత్ర, సామాజిక సేవ, నాయకత్వ లక్షణాలపై తమ అభిప్రాయాలను వ్యక్తం చేశారు.
ఈ కార్యక్రమంలో డాక్టర్ వి. దత్తహరి, డాక్టర్ బి. రామలింగం, డాక్టర్ ఎం. నర్సయ్య, డాక్టర్ బి. ప్రవీణ్ తదితర అధ్యాపకులు, ఎన్ఎస్ఎస్ వాలంటీర్లు, విద్యార్థులు పాల్గొన్నారు.

























