నేరాల నియంత్రణకు ముందస్తు చర్యలు చేపట్టాలి
ప్రజా ఫిర్యాదుల పరిష్కారంలో నిర్లక్ష్యం వద్దు: జిల్లా ఎస్పీ ఎం. రాజేశ్ చంద్ర…
త్రిశూల్ న్యూస్ రిపోర్టర్ గడిల లింగం
భిక్నూర్: నేరాల నియంత్రణకు ముందస్తు చర్యలు చేపట్టాలని, ప్రజా ఫిర్యాదుల పరిష్కారంలో నిర్లక్ష్యం వహించవద్దని జిల్లా ఎస్పీ ఎం. రాజేశ్ చంద్ర పోలీస్ సిబ్బందికి సూచించారు.
వార్షిక తనిఖీల్లో భాగంగా భిక్నూర్ పోలీస్ స్టేషన్‌ను సందర్శించిన జిల్లా ఎస్పీ, స్టేషన్‌లోని రికార్డులను పరిశీలించారు. పోలీస్ స్టేషన్ పరిధిలో నేరాల పరిస్థితి, అనుమానితుల కదలికలు, రౌడీషీటర్ల వివరాలు, నేరాల నియంత్రణకు తీసుకుంటున్న చర్యలపై సమీక్ష నిర్వహించారు.
ఈ సందర్భంగా ఎస్పీ మాట్లాడుతూ.. కేసు ఫైళ్లు, కేసు డైరీలు, జనరల్ డైరీ, ఎఫ్‌ఐఆర్ తదితర రికార్డులను ఎప్పటికప్పుడు నవీకరించాలని ఆదేశించారు. పోలీస్ స్టేషన్‌కు వచ్చే ఫిర్యాదుదారులతో మర్యాదపూర్వకంగా వ్యవహరించాలని, బాధితుల సమస్యలను ఓపికగా విని చట్టప్రకారం తక్షణ చర్యలు తీసుకోవాలని సూచించారు.
దీర్ఘకాలంగా పెండింగ్‌లో ఉన్న కేసులను త్వరితగతిన పరిష్కరించాలని, అవసరమైన సాక్ష్యాధారాలను సేకరించి నిందితులకు శిక్ష పడేలా చార్జిషీట్లు దాఖలు చేయాలన్నారు. పాత నేరస్తులు, రౌడీషీటర్లపై నిరంతర నిఘా ఉంచాలని, రాత్రి గస్తీని మరింత పటిష్టం చేయాలని సూచించారు.
గంజాయి, ఇతర మాదకద్రవ్యాల అక్రమ రవాణా, వినియోగంపై ప్రత్యేక దృష్టి సారించాలన్నారు. సైబర్ నేరాలు, ఆన్‌లైన్ మోసాలపై ప్రజలకు అవగాహన కల్పించాలని, మహిళలు, బాలికల భద్రతకు ప్రాధాన్యతనిస్తూ వారి ఫిర్యాదులపై వెంటనే స్పందించాలన్నారు.
అదేవిధంగా హెల్మెట్ ధరించడం, మద్యం సేవించి వాహనాలు నడపకపోవడం, అతివేగాన్ని నియంత్రించడం వంటి అంశాలపై ప్రజలకు అవగాహన కల్పించి రోడ్డు ప్రమాదాల నివారణకు కృషి చేయాలని పోలీస్ సిబ్బందికి సూచించారు.
ఈ తనిఖీలో కామారెడ్డి డీఎస్పీ ఎస్. మధుసూదన్, భిక్నూర్ సీఐ జె. నరేష్, ఎస్‌హెచ్‌ఓ అనిల్‌తో పాటు ఇతర పోలీస్ సిబ్బంది పాల్గొన్నారు.
