ఆహార భద్రతపై ప్రత్యేక దృష్టి
పాఠశాలలు, వసతి గృహాల్లో క్రమం తప్పకుండా తనిఖీలు నిర్వహించాలి: కలెక్టర్ ఆశిష్ సంగ్వాన్…
త్రిశూల్ న్యూస్ రిపోర్టర్ గడిల లింగం
కామారెడ్డి కలెక్టరేట్‌లో జిల్లా స్థాయి ఆహార భద్రత సలహా మండలి సమావేశం కలెక్టర్ ఆశిష్ సంగ్వాన్ అధ్యక్షతన నిర్వహించారు. ఫుడ్ సేఫ్టీ ఆఫీసర్ జి. విక్రమ్ ఆధ్వర్యంలో జరిగిన ఈ సమావేశంలో అదనపు కలెక్టర్ ఎన్.వై. గిరి, వివిధ శాఖల జిల్లా అధికారులు, సలహా మండలి సభ్యులు పాల్గొన్నారు.
ఈ సందర్భంగా జిల్లాలో ఆహార భద్రత ప్రమాణాల అమలు, ఆహార పదార్థాల నాణ్యత, పరిశుభ్రత తదితర అంశాలపై సమీక్ష నిర్వహించారు. ప్రజలకు నాణ్యమైన, సురక్షితమైన ఆహారం అందేలా అవసరమైన చర్యలు చేపట్టాలని కలెక్టర్ అధికారులను ఆదేశించారు.
ముఖ్యంగా పాఠశాలలు, వసతి గృహాల్లో పరిశుభ్రమైన వాతావరణం ఉండేలా క్రమం తప్పకుండా తనిఖీలు నిర్వహించాలని సూచించారు. విద్యార్థులకు అందించే ఆహారం, తాగునీటి నాణ్యతపై అధికారులు ప్రత్యేక దృష్టి సారించాలని కలెక్టర్ తెలిపారు.
అలాగే జిల్లాలోని ఆహార వ్యాపార సంస్థలు తప్పనిసరిగా చెల్లుబాటు అయ్యే లైసెన్స్ లేదా రిజిస్ట్రేషన్ కలిగి ఉండాలని స్పష్టం చేశారు. ఆహార భద్రత నిబంధనలను ఉల్లంఘించే వారిపై నిబంధనల ప్రకారం చర్యలు తీసుకోవాలని ఆదేశించారు.
ఆహార భద్రత విషయంలో ఎలాంటి నిర్లక్ష్యానికి తావులేకుండా సంబంధిత శాఖల అధికారులు సమన్వయంతో పనిచేయాలని కలెక్టర్ సూచించారు. ప్రజల ఆరోగ్యాన్ని దృష్టిలో ఉంచుకుని ఆహార పదార్థాల నాణ్యత, పరిశుభ్రతపై నిరంతరం పర్యవేక్షణ కొనసాగించాలని తెలిపారు.
ఈ సమావేశంలో జిల్లా సంక్షేమ శాఖ అధికారి ప్రసన్న, డీపీఓ మురళితో పాటు పలువురు జిల్లా అధికారులు, సంబంధిత శాఖల సిబ్బంది పాల్గొన్నారు.
