అర్హులైన నిరుద్యోగ కళాకారులందరికీ ఉద్యోగాలు కల్పించాలి.
నిజామాబాద్: తెలంగాణ ఉద్యమంలో కీలక పాత్ర పోషించిన అర్హులైన నిరుద్యోగ కళాకారులందరికీ ఉద్యోగాలు కల్పించాలని నిజామాబాద్ ఉద్యమ నిరుద్యోగ కళాకారుల అధ్యక్షుడు చిట్టిబాబు ప్రభుత్వాన్ని కోరారు. కాంగ్రెస్ ప్రభుత్వం ఎన్నికల మేనిఫెస్టోలో కళాకారులకు ఇచ్చిన హామీలను వెంటనే అమలు చేయాలని డిమాండ్ చేశారు.
బుధవారం హైదరాబాద్‌లోని రవీంద్రభారతి వద్ద కళాకారులు నిర్వహించనున్న శాంతియుత నిరసన కార్యక్రమానికి నిజామాబాద్ జిల్లా నుంచి కళాకారులు బయలుదేరేందుకు సిద్ధమయ్యారు. అయితే ఇంటెలిజెన్స్ సమాచారం ఆధారంగా పోలీసులు పలువురు కళాకారులను వారి ఇళ్ల వద్దే ముందస్తుగా నిర్బంధించి, హైదరాబాద్‌లో జరిగే నిరసన కార్యక్రమానికి వెళ్లవద్దని సూచించినట్లు కళాకారులు తెలిపారు.
అయినప్పటికీ ఉద్యోగాల కోసం కొంతమంది కళాకారులు హైదరాబాద్‌లోని రవీంద్రభారతి వద్దకు చేరుకున్నారని తెలిపారు. ప్రధాన కార్యదర్శి గణేష్, కళాకారుడు గోపాల్ ఒకరోజు ముందుగానే హైదరాబాద్‌కు వెళ్లి నిరసన కార్యక్రమంలో పాల్గొనేందుకు సిద్ధమయ్యారని చెప్పారు.
ప్రభుత్వం ఇచ్చిన హామీని అమలు చేయాలి
తెలంగాణ ఉద్యమ సమయంలో గోసి, గొంగడి ధరించి, తమ పనులను సైతం పక్కనపెట్టి కుటుంబాలకు దూరంగా ఉంటూ ఊరూరా తిరిగి ధూమ్‌ధామ్ కార్యక్రమాల ద్వారా ప్రజల్లో చైతన్యం తీసుకొచ్చామని కళాకారులు గుర్తుచేశారు. తెలంగాణ రాష్ట్రం ఏర్పడితే తమ జీవితాలు, కుటుంబాల భవిష్యత్తు బాగుంటుందని ఆశించామని, కానీ ప్రస్తుతం తమ కుటుంబాలు ఆర్థిక ఇబ్బందులను ఎదుర్కొంటున్నాయని ఆవేదన వ్యక్తం చేశారు.
గత ప్రభుత్వం కొంతమంది కళాకారులకు మాత్రమే ఉద్యోగాలు కల్పించిందని, కాంగ్రెస్ ప్రభుత్వం ఎన్నికల మేనిఫెస్టోలో అర్హులైన కళాకారులకు ఉద్యోగాలు కల్పిస్తామని హామీ ఇచ్చిందని చిట్టిబాబు తెలిపారు. ప్రభుత్వం ఏర్పడి సుమారు వెయ్యి రోజులు గడిచినా ఇప్పటివరకు ఉద్యోగాలపై స్పష్టమైన ప్రకటన రాలేదని అన్నారు.
నియోజకవర్గ స్థాయిలో ఎమ్మెల్యేలు, మంత్రులను కలిసి పలుమార్లు తమ సమస్యను వివరించినప్పటికీ ఆశించిన ఫలితం దక్కలేదని కళాకారులు తెలిపారు. ఇప్పటికైనా రాష్ట్ర ప్రభుత్వం స్పందించి అర్హులైన కళాకారులకు ఉద్యోగాలు కల్పించి వారి కుటుంబాలను ఆదుకోవాలని కోరారు.
నిజామాబాద్‌లో 200 మందికి పైగా కళాకారులు
నిజామాబాద్ జిల్లాలో 200 మందికి పైగా ఉద్యమ నిరుద్యోగ కళాకారులు ఉన్నారని, వారిలో కేవలం 25 మందికి మాత్రమే ఉద్యోగాలు కల్పించడం సరైన విధానం కాదని చిట్టిబాబు అన్నారు. అర్హత ఉన్న ప్రతి కళాకారుడికి ఉద్యోగ అవకాశం కల్పించాలని డిమాండ్ చేశారు.
నిరసనకు వెళ్లకుండా పోలీసులు అడ్డుకున్నారని ఆరోపణ
రవీంద్రభారతి వద్ద నిర్వహించిన నిరసన కార్యక్రమానికి వెళ్లకుండా పోలీసులు ముందస్తుగా అడ్డుకున్నారని కళాకారులు ఆరోపించారు. చిట్టిబాబు, కర్క రమేష్, మహేందర్, పొగరీ సంజీవ్, గోదావరి, స్రవంతి, సంతోష్, నరేష్, శ్రీధర్ తదితరులను వారి ఇళ్ల వద్దే పోలీసులు అడ్డుకున్నారని తెలిపారు.
గత ప్రభుత్వం 550 ఉద్యోగాలు కల్పించిందని, కాంగ్రెస్ పార్టీ ఎన్నికల మేనిఫెస్టోలో 1,500 ఉద్యోగాలు ఇస్తామని హామీ ఇచ్చిందని కళాకారులు పేర్కొన్నారు. ప్రభుత్వం ఏర్పడి వెయ్యి రోజులు గడిచినా ఒక్క ఉద్యోగం కూడా ఇవ్వలేదని వారు విమర్శించారు.
అర్హులైన ఉద్యమ కళాకారులందరికీ ఉద్యోగాలు కల్పించి, వారి కుటుంబాల్లో వెలుగులు నింపాలని కళాకారులు రాష్ట్ర ప్రభుత్వాన్ని కోరుతున్నారు.
