5వ తెలంగాణ పోలీస్ స్పోర్ట్స్ అండ్ గేమ్స్ మీట్–2026 నిర్వహణపై పోలీస్ కమిషనర్ సమీక్ష
క్రీడాకారులకు మెరుగైన సౌకర్యాలు కల్పించాలి: పోలీస్ కమిషనర్ పి. సాయి చైతన్య…
త్రిశూల్ న్యూస్ రిపోర్టర్ ప్రభాకర్
నిజామాబాద్: నిజామాబాద్‌లో నవంబర్ 2026లో నిర్వహించనున్న 5వ తెలంగాణ పోలీస్ స్పోర్ట్స్ అండ్ గేమ్స్ మీట్–2026కు సంబంధించి చేపట్టాల్సిన ఏర్పాట్లపై పోలీస్ కమిషనర్ పి. సాయి చైతన్య, ఐపీఎస్ ఆధ్వర్యంలో సమీక్ష సమావేశం నిర్వహించారు. నిజామాబాద్ పోలీస్ కమిషనరేట్ కార్యాలయంలోని మినీ కాన్ఫరెన్స్ హాల్‌లో జరిగిన ఈ సమావేశంలో వివిధ విభాగాల అధికారులు పాల్గొన్నారు.
ఈ సందర్భంగా క్రీడా పోటీల నిర్వహణకు అవసరమైన ట్రాక్‌ల ఏర్పాటు, క్రీడా మైదానాల సిద్ధీకరణ, క్రీడాకారులకు వసతి, వైద్య సేవలు, తాగునీటి సరఫరా, భోజన ఏర్పాట్లు తదితర అంశాలపై పోలీస్ కమిషనర్ సంబంధిత అధికారులతో సమగ్రంగా చర్చించారు.
వివిధ ప్రాంతాల నుంచి క్రీడా పోటీల్లో పాల్గొనే పోలీస్ క్రీడాకారులకు ఎలాంటి అసౌకర్యం కలగకుండా ముందస్తు ప్రణాళికతో అన్ని ఏర్పాట్లు పూర్తి చేయాలని అధికారులకు సూచించారు. క్రీడాకారులకు నాణ్యమైన వసతి, భోజనం, తాగునీటి సౌకర్యాలు కల్పించడంతో పాటు, వారి ఆరోగ్య భద్రతకు ప్రాధాన్యతనిస్తూ అవసరమైన వైద్య సిబ్బందిని, ప్రథమ చికిత్స సదుపాయాలను అందుబాటులో ఉంచాలని ఆదేశించారు.
కార్యక్రమ నిర్వహణలో ఎలాంటి ఇబ్బందులు తలెత్తకుండా సంబంధిత విభాగాల అధికారులు సమన్వయంతో పనిచేయాలని, వారికి అప్పగించిన బాధ్యతలను సమర్థవంతంగా నిర్వర్తించాలని పోలీస్ కమిషనర్ సూచించారు. ఏర్పాట్లను ఎప్పటికప్పుడు పర్యవేక్షిస్తూ, క్రీడాకారులకు మెరుగైన సౌకర్యాలు కల్పించి 5వ తెలంగాణ పోలీస్ స్పోర్ట్స్ అండ్ గేమ్స్ మీట్–2026ను విజయవంతంగా నిర్వహించాలని స్పష్టం చేశారు.
ఈ క్రీడా పోటీలను పోలీస్ ట్రైనింగ్ సెంటర్ (జన్‌కంపేట్), అలీసాగర్, నాగారం గ్రౌండ్, కాలూరు రోడ్డు, ప్రభుత్వ స్విమ్మింగ్ పూల్, ముగుపాల్ ఆర్చరీ అకాడమీ తదితర ప్రాంతాల్లో నిర్వహించనున్నారు.
ఈ సమావేశంలో నిజామాబాద్ అదనపు డీసీపీ (అడ్మిన్) ఎన్. శుభం ప్రకాష్‌తో పాటు నిజామాబాద్, ఆర్మూర్, బోధన్, సీటీసీ, ఏఆర్, ఐటీ, సీసీఆర్‌బీ, ట్రాఫిక్ విభాగాలకు చెందిన ఏసీపీలు ప్రకాష్, వెంకటేశ్వరరెడ్డి, శ్రీనివాస్, రాజశేఖర్, కృష్ణ, నరేందర్, గురు నాయుడు, మస్తాన్ అలీ పాల్గొన్నారు.
అలాగే డీవైఎస్‌ఓ బి. పవన్ కుమార్, ఆర్చరీ కోచ్ రవీందర్, స్విమ్మింగ్ కోచ్ మహిపాల్ రెడ్డి, అథ్లెటిక్స్ సెక్రటరీ రాజా గౌడ్, తెలంగాణ సైక్లింగ్ అసోసియేషన్ జనరల్ సెక్రటరీ విజయ్ కాంత్ రావు, స్పెషల్ బ్రాంచ్ ఇన్‌స్పెక్టర్ శ్రీనివాసరాజ్, రిజర్వ్ ఇన్‌స్పెక్టర్లు, ఇతర అధికారులు పాల్గొన్నారు.
