నీటిని పొదుపుగా వినియోగిద్దాం.. ఎల్‌నినో ప్రభావాన్ని సమష్టిగా ఎదుర్కొందాం
నీటి సంరక్షణ మనందరి బాధ్యత: ఎఫ్‌ఆర్‌ఓ రవి మోహన్ బట్టు…
త్రిశూల్ న్యూస్ ఇందల్వాయి మండల్ రిపోర్టర్ వైకుంఠం
నిజామాబాద్ జిల్లా ఇందల్వాయి మండలంలో నీటిని పొదుపుగా వినియోగిస్తూ, భూగర్భ జలాలను పరిరక్షించుకోవాలని ఇందల్వాయి ఫారెస్ట్ రేంజ్ అధికారి (ఎఫ్‌ఆర్‌ఓ) రవి మోహన్ బట్టు ప్రజలకు సూచించారు. ఎల్‌నినో ప్రభావంతో తలెత్తే వాతావరణ మార్పులను ఎదుర్కోవడానికి నీటి సంరక్షణపై ప్రతి ఒక్కరూ అవగాహన కలిగి ఉండాలని ఆయన పేర్కొన్నారు.
ఈ సందర్భంగా ఆయన మాట్లాడుతూ.. నీటిని వృథా చేయకుండా అవసరాలకు అనుగుణంగా పొదుపుగా వినియోగించాలని సూచించారు. అనుమతులు లేకుండా ఇష్టారాజ్యంగా బోర్‌వెల్స్‌ తవ్వకూడదని, భూగర్భ జలాలను కాపాడేందుకు ప్రతి ఒక్కరూ బాధ్యతగా వ్యవహరించాలని కోరారు. వ్యవసాయంలో బిందు సేద్య పద్ధతులను అనుసరించడం ద్వారా నీటి వృథాను అరికట్టవచ్చని తెలిపారు.
చెరువులు, కుంటలు, రిజర్వాయర్లలోని నీటిని సమర్థవంతంగా వినియోగించుకోవాలని, తాగునీటి భద్రతకు ప్రాధాన్యత ఇవ్వాలని సూచించారు. వర్షపు నీటిని ఒడిసిపట్టేందుకు ఇంకుడు గుంతలను నిర్మించి, నీరు భూమిలోకి ఇంకేలా చర్యలు తీసుకోవాలని పిలుపునిచ్చారు.
అదేవిధంగా అడవుల్లోని వనరులను సంరక్షించడంతో పాటు వన్యప్రాణులకు అవసరమైన నీటి లభ్యతను కాపాడాలని తెలిపారు. భవిష్యత్ తరాలకు నీటి కొరత ఏర్పడకుండా ఉండాలంటే నేటి నుంచే నీటి సంరక్షణకు ప్రతి ఒక్కరూ కృషి చేయాలని ఎఫ్‌ఆర్‌ఓ రవి మోహన్ బట్టు కోరారు.
