లక్ష్మాపూర్లో ఉచిత వైద్య శిబిరం.. విశేష స్పందన
సమాజం పట్ల బాధ్యతగా ఉచిత వైద్య సేవలు అందిస్తున్నాం: డాక్టర్ నునావత్ మధుకర్, డాక్టర్ శ్రీలత రాథోడ్…
త్రిశూల్ న్యూస్ రిపోర్టర్ ప్రభాకర్
నిజామాబాద్ జిల్లా : చందూర్ మండలం లక్ష్మాపూర్ గ్రామంలో నిర్వహించిన ఉచిత వైద్య శిబిరానికి విశేష స్పందన లభించింది. గ్రామ సర్పంచ్ సంజీవ్ ప్రోత్సాహంతో శ్రీముఖి స్కిన్, హెయిర్, లేజర్ హాస్పిటల్ వైద్య నిపుణులు డాక్టర్ నునావత్ మధుకర్, శ్రీ భవాని కేర్ సూపర్ స్పెషాలిటీ హాస్పిటల్ వైద్యురాలు డాక్టర్ శ్రీలత రాథోడ్ ఆధ్వర్యంలో ఈ శిబిరాన్ని నిర్వహించారు.
ఈ సందర్భంగా వైద్యులు మాట్లాడుతూ.. సమాజం పట్ల తమకున్న బాధ్యతగా గ్రామీణ ప్రాంత ప్రజలకు ఉచిత వైద్య సేవలు అందించేందుకు ముందుకు వచ్చామని తెలిపారు. ప్రజలకు మెరుగైన వైద్య సేవలు అందుబాటులోకి తీసుకురావడమే తమ లక్ష్యమని పేర్కొన్నారు.
శిబిరంలో గ్రామస్తులకు బీపీ, షుగర్ తదితర వైద్య పరీక్షలు నిర్వహించి, ఆరోగ్య పరిరక్షణపై అవగాహన కల్పించారు. అవసరమైన వారికి ఉచితంగా మందులు పంపిణీ చేశారు. వైద్య సేవలు అందించిన వైద్యులను గ్రామ అభివృద్ధి కమిటీ సభ్యులు, గ్రామస్తులు శాలువాలు, జ్ఞాపికలతో ఘనంగా సన్మానించారు.

























