ప్రజా పాలనలో మరో సంక్షేమ పథకం.. ఇందిరమ్మ కుటుంబ బీమా
ప్రతి కుటుంబానికి రూ.5 లక్షల ఆర్థిక భరోసా కల్పించడం అభినందనీయం: జిల్లా కాంగ్రెస్ పార్టీ ఉపాధ్యక్షుడు నాగరాజ్ గౌడ్…
త్రిశూల్ న్యూస్ రిపోర్టర్ గడిల లింగం
కామారెడ్డి జిల్లా : తెలంగాణ రాష్ట్ర ప్రజా ప్రభుత్వం ప్రజల సంక్షేమమే లక్ష్యంగా మరో ప్రతిష్టాత్మక పథకానికి శ్రీకారం చుట్టడం పట్ల జిల్లా కాంగ్రెస్ పార్టీ ఉపాధ్యక్షుడు అంకన్నగారి నాగరాజ్ గౌడ్ హర్షం వ్యక్తం చేశారు. నవంబర్ 19న ఇందిరమ్మ కుటుంబ బీమా పథకాన్ని ప్రవేశపెట్టనున్న నేపథ్యంలో ఆయన ఈ పథకాన్ని స్వాగతించారు.
ఈ సందర్భంగా నాగరాజ్ గౌడ్ మాట్లాడుతూ.. ముఖ్యమంత్రి రేవంత్ రెడ్డి నాయకత్వంలో రాష్ట్ర ప్రభుత్వం ప్రతి కుటుంబానికి రూ.5 లక్షల ఆర్థిక భరోసా కల్పించే లక్ష్యంతో ఇందిరమ్మ కుటుంబ బీమా పథకాన్ని అమలు చేయాలని నిర్ణయించడం అభినందనీయమన్నారు.
ప్రజా సంక్షేమమే ప్రధాన ధ్యేయంగా పాలన సాగిస్తున్న కాంగ్రెస్ ప్రభుత్వం, ప్రజలకు ఇచ్చిన హామీల అమలులో భాగంగా మరో కీలకమైన సంక్షేమ పథకాన్ని తీసుకురావడం సంతోషకరమని పేర్కొన్నారు. కుటుంబంలో అనుకోని కారణాలతో ఎవరైనా మరణిస్తే ఆ కుటుంబం ఆర్థికంగా ఇబ్బందులకు గురికాకుండా అండగా నిలవాలనే గొప్ప సంకల్పంతో ఈ పథకాన్ని రూపొందించినట్లు తెలిపారు.
ఈ పథకం ద్వారా ఆపద సమయంలో బాధిత కుటుంబాలకు రూ.5 లక్షల ఆర్థిక భరోసా లభించడంతో పాటు, ప్రతి కుటుంబానికి ప్రజా ప్రభుత్వం అండగా ఉంటుందనే నమ్మకం కలుగుతుందని అన్నారు. ప్రజా పాలనలో సంక్షేమం, సామాజిక భద్రతకు ప్రభుత్వం ప్రాధాన్యత ఇస్తోందని పేర్కొన్నారు.
ఇందిరమ్మ కుటుంబ బీమా పథకం ప్రయోజనాలను ప్రజల్లోకి విస్తృతంగా తీసుకెళ్తామని నాగరాజ్ గౌడ్ తెలిపారు. ఇప్పటికే కాంగ్రెస్ ప్రభుత్వం అమలు చేస్తున్న సంక్షేమ పథకాలను అర్హులైన ప్రజలకు చేరవేస్తూ, కొత్తగా ప్రవేశపెట్టనున్న ఇందిరమ్మ కుటుంబ బీమా పథకం ద్వారా కలిగే ప్రయోజనాలను కూడా ప్రజలకు వివరిస్తామని అన్నారు.
ఈ ప్రతిష్టాత్మక సంక్షేమ పథకాన్ని ప్రవేశపెడుతున్న ముఖ్యమంత్రి రేవంత్ రెడ్డి, ఉప ముఖ్యమంత్రి భట్టి విక్రమార్క, మంత్రివర్గ సభ్యులు, ప్రభుత్వ సలహాదారు మహమ్మద్ షబ్బీర్ అలీ, టీపీసీసీ అధ్యక్షుడు మహేష్ కుమార్ గౌడ్లకు ఈ సందర్భంగా నాగరాజ్ గౌడ్ ప్రత్యేక ధన్యవాదాలు తెలిపారు.

























