కళలకు, క్రీడలకు నిలయంగా ఇందూరు
జిల్లా స్థాయి యువజనోత్సవాల ముగింపు కార్యక్రమంలో ఎమ్మెల్యే ధన్‌పాల్ సూర్యనారాయణ…
ఇందూరు: కళలకు, క్రీడలకు నిలయంగా ఇందూరు నిలుస్తోందని నిజామాబాద్ అర్బన్ ఎమ్మెల్యే ధన్‌పాల్ సూర్యనారాయణ అన్నారు. మేరా యువ భారత్ ఆధ్వర్యంలో నిర్వహించిన జిల్లా స్థాయి యువజనోత్సవాల ముగింపు కార్యక్రమంలో ఆయన పాల్గొన్నారు.
ఈ సందర్భంగా ఎమ్మెల్యే మాట్లాడుతూ.. ప్రధానమంత్రి నరేంద్ర మోదీ నేతృత్వంలోని కేంద్ర ప్రభుత్వం యువతను వివిధ రంగాల్లో ప్రోత్సహిస్తోందన్నారు. ముఖ్యంగా ‘మై భారత్’ కార్యక్రమం ద్వారా యువతలో నాయకత్వ లక్షణాలు, సామాజిక సేవాభావం పెంపొందించేలా కృషి చేస్తోందని తెలిపారు.
యువతలో విద్య, నైపుణ్యం, క్రీడా స్ఫూర్తి, సామాజిక బాధ్యత, దేశభక్తి వంటి లక్షణాలు అలవడాలని ఆకాంక్షించారు. ఇలాంటి పోటీల ద్వారా యువత తమ ప్రతిభను చాటుకునే అవకాశం లభిస్తుందన్నారు. క్రీడాకారులు, యువ కళాకారులకు తన ట్రస్ట్ ద్వారా ఎల్లప్పుడూ సహాయ సహకారాలు అందిస్తానని హామీ ఇచ్చారు.
ఇందూరులో పెండింగ్‌లో ఉన్న కళాభారతి, క్రీడా స్టేడియం నిర్మాణాలను పూర్తి చేయడమే తన లక్ష్యమని స్పష్టం చేశారు. ఈ అంశాలను ఇప్పటికే పలుమార్లు రాష్ట్ర ప్రభుత్వం దృష్టికి తీసుకెళ్లినట్లు గుర్తుచేశారు. జిల్లా స్థాయిలో విజయం సాధించిన యువత రాష్ట్ర, జాతీయ స్థాయిలోనూ రాణించి ఇందూరు ఖ్యాతిని చాటాలని పిలుపునిచ్చారు.
యువత డ్రగ్స్, ఇతర మత్తు పదార్థాలకు దూరంగా ఉంటూ కళలు, క్రీడల్లో ప్రతిభను నిరూపించుకోవాలని సూచించారు.
అనంతరం వివిధ పోటీల్లో విజేతలుగా నిలిచిన యువతీ యువకులకు ఎమ్మెల్యే బహుమతులు అందజేశారు.
ఈ కార్యక్రమంలో జిల్లా యువజన అధికారి రమేష్, జిల్లా క్రీడల అభివృద్ధి అధికారి పవన్ కుమార్, తెలంగాణ విశ్వవిద్యాలయ ప్రొఫెసర్ అపర్ణ, బాలభవన్ సూపరింటెండెంట్ ఉమాబాల, న్యాయనిర్ణేతలు పుష్ప, శ్వేతారెడ్డి, సిర్ప లింగం, కోకిల నాగరాజు తదితరులు పాల్గొన్నారు.
