తెలంగాణ యూనివర్సిటీలో రేపు ‘వికసిత్ భారత్ యువ సంవాద్ – 2026’
యువతలో ప్రజాస్వామ్య విలువలు, పౌర బాధ్యతలు, నాయకత్వ లక్షణాలపై అవగాహన…
త్రిశూల్ న్యూస్ రిపోర్టర్ ప్రభాకర్
నిజామాబాద్, నవంబర్ 4: తెలంగాణ విశ్వవిద్యాలయంలో నవంబర్ 5న ‘మై భారత్ – వికసిత్ భారత్ యువ సంవాద్ – 2026’ కార్యక్రమాన్ని నిర్వహించనున్నట్లు ఎన్‌ఎస్‌ఎస్ కోఆర్డినేటర్ ప్రొఫెసర్ కె. అపర్ణ ఒక ప్రకటనలో తెలిపారు.
భారత ప్రభుత్వ యువజన వ్యవహారాలు, క్రీడల మంత్రిత్వ శాఖ ఆధ్వర్యంలోని మేరా యువ భారత్ (MY Bharat) కార్యక్రమంలో భాగంగా ఈ కార్యక్రమాన్ని నిర్వహిస్తున్నట్లు పేర్కొన్నారు. రేపు ఉదయం 11 గంటలకు తెలంగాణ విశ్వవిద్యాలయంలోని కామర్స్ అండ్ బిజినెస్ మేనేజ్‌మెంట్ సెమినార్ హాల్‌లో ఈ కార్యక్రమం జరగనుందని వెల్లడించారు.
ఈ సందర్భంగా ప్రొఫెసర్ అపర్ణ మాట్లాడుతూ.. యువతలో ప్రజాస్వామ్య విలువలు, పౌర బాధ్యతలు, నాయకత్వ లక్షణాలు, దేశ నిర్మాణంలో యువత పాత్రపై అవగాహన కల్పించడమే ఈ కార్యక్రమ ముఖ్య ఉద్దేశమని తెలిపారు.
కార్యక్రమంలో విద్యార్థులతో ముఖాముఖి చర్చలు, అభిప్రాయాల వ్యక్తీకరణతో పాటు ప్రజాస్వామ్య ప్రతిజ్ఞ నిర్వహించనున్నట్లు వివరించారు. వికసిత్ భారత్ 2047 లక్ష్య సాధనలో యువతను భాగస్వాములను చేస్తూ, బాధ్యతాయుతమైన పౌరులుగా తీర్చిదిద్దేందుకు ఈ కార్యక్రమం దోహదపడుతుందని పేర్కొన్నారు.
విద్యార్థులు, ఎన్‌ఎస్‌ఎస్ ప్రోగ్రామ్ అధికారులు, యువత అధిక సంఖ్యలో పాల్గొని కార్యక్రమాన్ని విజయవంతం చేయాలని ఆమె కోరారు.
