మలేరియా మాసోత్సవం సందర్భంగా ఐలాపూర్‌లో ప్రత్యేక వైద్య శిబిరం…
నందిపేట్, జూలై 23 : మలేరియా మాసోత్సవం సందర్భంగా నందిపేట్ మండలం ఐలాపూర్ గ్రామంలో గురువారం వైద్య ఆరోగ్య శాఖ ఆధ్వర్యంలో ప్రత్యేక వైద్య శిబిరం నిర్వహించారు. ఈ శిబిరంలో గ్రామస్తులకు రక్తపోటు (బీపీ), మధుమేహం (షుగర్), డెంగ్యూ, మలేరియా పరీక్షలు నిర్వహించి అవసరమైన మందులను ఉచితంగా అందజేశారు.
అనంతరం వర్షాకాలంలో ప్రబలే మలేరియా, డెంగ్యూ తదితర వ్యాధుల నివారణకు తీసుకోవాల్సిన జాగ్రత్తలపై ప్రజలకు అవగాహన కల్పించారు. పరిసరాలను పరిశుభ్రంగా ఉంచుకోవడం, ఇంటి పరిసరాల్లో నీరు నిల్వ ఉండకుండా చూసుకోవడం, దోమల నివారణ చర్యలు చేపట్టాలని సూచించారు.
ఈ సందర్భంగా గ్రామ సర్పంచ్ మీసాల లక్ష్మీనారాయణ, గ్రామ కార్యదర్శి ఆధ్వర్యంలో మురికి కాల్వలను పరిశీలించి, దోమల నివారణ కోసం టెమెఫాస్ స్ప్రే చేయించారు.
ఈ కార్యక్రమంలో వైద్యాధికారి డా. ప్రవీణ్, వైద్య సిబ్బంది, ఆశా కార్యకర్తలు, గ్రామ ప్రజలు పాల్గొన్నారు.
