అసెంబ్లీలో ఆర్మూర్ ఎమ్మెల్యే రాకేశ్రెడ్డి గళం…
హైదరాబాద్, సెప్టెంబర్ 18: తెలంగాణ అసెంబ్లీ సమావేశాల్లో జీరో అవర్లో ఆర్మూర్ ఎమ్మెల్యే పైడి రాకేశ్రెడ్డి నియోజకవర్గం, నిజామాబాద్ జిల్లా అభివృద్ధి అంశాలను ప్రస్తావించారు. రెండు రోజుల క్రితం తాను రాజీనామా చేస్తానని చేసిన వ్యాఖ్యలను గత మూడు నెలలుగా ఆలోచించిన తర్వాతే చెప్పానని ఆయన తెలిపారు. రాజకీయాలు నవ్వులాటగా మారుతున్నాయని వ్యాఖ్యానించారు.
తెలంగాణ రాష్ట్రం నీళ్లు, నిధులు, నియామకాల కోసం జరిగిన పోరాటంతో ఏర్పడిందని పేర్కొన్న రాకేశ్రెడ్డి.. ప్రస్తుతం నిజామాబాద్ జిల్లా ఈ మూడు అంశాల్లో వెనుకబడుతోందని సభలో ఆవేదన వ్యక్తం చేశారు. ఆలూరు మండలం గుత్ప గ్రామ శివారులోని రాజన్న చెరువు నీటి సామర్థ్యాన్ని పెంచితే సుమారు 20 వేల ఎకరాలకు సాగునీరు అందే అవకాశం ఉందని తెలిపారు. మాదాపూర్ చెరువులోకి నీరు రాక సుమారు 10 వేల ఎకరాల పంటల పరిస్థితి అయోమయంగా మారిందని అన్నారు.
శ్రీరాంసాగర్ ప్రాజెక్టు నిర్మాణం కోసం ఎన్నో గ్రామాలను ఖాళీ చేసి ప్రజలు త్యాగాలు చేశారని పేర్కొన్నారు. గుత్ప ఎత్తిపోతల పథకం బ్యాలెన్సింగ్ పనులకు సంబంధించిన సుమారు రూ.7 కోట్ల బిల్లులు పెండింగ్లో ఉండటంతో రైతులు, తండాల ప్రజలు ఇబ్బందులు ఎదుర్కొంటున్నారని తెలిపారు.
నియోజకవర్గంలోని 14 చిన్న లిఫ్ట్ మోటార్లు మరమ్మతులకు నోచుకోకపోవడంతో ఇబ్బందులు ఎదురవుతున్నాయని, సుమారు రూ.8 కోట్లు మంజూరు చేస్తే వాటిని పునరుద్ధరించవచ్చని ప్రభుత్వాన్ని కోరారు.
రాజకీయాలకు అతీతంగా ఆర్మూర్ నియోజకవర్గంపై ముఖ్యమంత్రి ప్రత్యేక సమీక్ష నిర్వహించాలని రాకేశ్రెడ్డి విజ్ఞప్తి చేశారు. నందిపేట్లో ప్రాథమిక ఆరోగ్య కేంద్రాలు, కమ్యూనిటీ హెల్త్ సెంటర్లు ఏర్పాటు చేయడంతో పాటు పామ్ ఆయిల్ పరిశ్రమలను ఏర్పాటు చేయాలని కోరారు.
రాష్ట్రంలో అభివృద్ధి కొన్ని జిల్లాలకే పరిమితమవుతోందని, మిగతా జిల్లాలపై వివక్ష ఉందని తాను భావిస్తున్నట్లు రాకేశ్రెడ్డి అసెంబ్లీలో పేర్కొన్నారు.
