తాళ్లరాంపూర్లో 49 కుటుంబాలను గ్రామ బహిష్కరణ చేశారని ఆరోపణలు
సీపీ సాయి చైతన్యకు బాధిత కుటుంబాల ఫిర్యాదు…
త్రిశూల్ న్యూస్ రిపోర్టర్ ప్రభాకర్
నిజామాబాద్ జిల్లా తాళ్లరాంపూర్ గ్రామంలో 49 కుటుంబాలను గ్రామ అభివృద్ధి కమిటీ (వీడీసీ) బహిష్కరించిందని ఆరోపిస్తూ బాధిత కుటుంబాలు నిజామాబాద్ పోలీస్ కమిషనర్ కార్యాలయాన్ని ఆశ్రయించాయి.
తాళ్లరాంపూర్ గ్రామానికి చెందిన 39 గౌడ కుటుంబాలు, 10 ఎస్సీ కుటుంబాలకు చెందిన బాధితులు కలిసి సెప్టెంబర్ 22, 2026న పోలీస్ కమిషనర్ సాయి చైతన్యను కలిసి తమ సమస్యలను వివరించారు.
గ్రామ అభివృద్ధి కమిటీ ఆధ్వర్యంలో తమపై సామాజిక గ్రామ బహిష్కరణ విధించారని బాధిత కుటుంబాలు ఆరోపించారు. ఇది రెండోసారి గ్రామ బహిష్కరణకు గురవుతున్నామని వారు తెలిపారు.
బహిష్కరణకు గురైన కుటుంబాలతో ఎవరూ మాట్లాడకూడదని, వారికి ఎలాంటి సహాయం చేయకూడదని, కిరాణా దుకాణాల నిర్వాహకులకు కూడా ఆంక్షలు విధించారని బాధితులు పేర్కొన్నారు. నిబంధనలు ఉల్లంఘించి బహిష్కరించిన కుటుంబాలతో మాట్లాడినా, వారికి సరుకులు ఇచ్చినా రూ.25 వేల జరిమానా విధిస్తామని వీడీసీ హెచ్చరించినట్లు వారు ఆరోపించారు.
అంతేకాకుండా గ్రామ అభివృద్ధి కమిటీ సభ్యుల నుంచి తమకు ఎప్పుడైనా దాడి జరిగే ప్రమాదం ఉందని, తమ కుటుంబాలకు రక్షణ కల్పించాలని సీపీ సాయి చైతన్యను బాధితులు కోరారు.
ఈ ఘటనకు గ్రామ అభివృద్ధి కమిటీతో పాటు ఆవుల దేవన్న, ఇట్టేడి రాజ్కుమార్ రెడ్డి, నాగులపల్లి అంజిరెడ్డి, క్యాతం దేవేందర్, క్యాతం గంగాధర్, తుమ్మల ఆనంద్, తమ్మడి రాజేష్, పోతుగంటి ఊషన్న తదితరులు కారణమని బాధితులు ఫిర్యాదులో పేర్కొన్నారు.
గ్రామ బహిష్కరణకు కారణమైన వారిపై చట్టపరమైన చర్యలు తీసుకోవడంతో పాటు తమకు పూర్తి రక్షణ కల్పించాలని తాళ్లరాంపూర్ కల్లుగీత కార్మిక సంఘం బాధిత గౌడ కుటుంబాలు, ఎస్సీ కుటుంబాలు పోలీస్ కమిషనర్ సాయి చైతన్యను కోరాయి.
బాధితుల ఫిర్యాదు మేరకు పోలీసులు ఈ వ్యవహారంపై విచారణ చేపట్టాల్సి ఉంది.
