బడా భీంగల్‌లో నాలుగు మహిళా భవనాలకు రూ.40 లక్షల మంజూరు…
త్రిశూల్ న్యూస్ రిపోర్టర్ కూనే జితేందర్
భీంగల్ మండలంలోని బడా భీంగల్ గ్రామానికి నాలుగు మహిళా భవనాలు మంజూరైనట్లు మండల కాంగ్రెస్ పార్టీ నాయకులు తెలిపారు. ఒక్కో మహిళా భవన నిర్మాణానికి రూ.10 లక్షల చొప్పున మొత్తం రూ.40 లక్షల నిధులు మంజూరు చేసినట్లు పేర్కొన్నారు.
మహిళలకు గ్రామస్థాయిలో సమావేశాలు, అవగాహన కార్యక్రమాలు, స్వయం సహాయక సంఘాల కార్యకలాపాలు నిర్వహించుకునేందుకు ఈ భవనాలు ఉపయోగపడనున్నాయని నాయకులు తెలిపారు. మహిళల సామాజిక, ఆర్థిక సాధికారతకు ఇటువంటి మౌలిక వసతులు దోహదపడతాయని పేర్కొన్నారు.
ఈ సందర్భంగా నాలుగు మహిళా భవనాలకు నిధులు మంజూరు చేయడంలో కృషి చేసిన బాల్కొండ నియోజకవర్గ కాంగ్రెస్ పార్టీ ఇన్‌చార్జి ముత్యాల సునీల్ కుమార్కు, రాష్ట్ర ముఖ్యమంత్రి రేవంత్ రెడ్డికి భీంగల్ మండల కాంగ్రెస్ పార్టీ అధ్యక్షుడి తరఫున కృతజ్ఞతలు తెలిపారు.
అదేవిధంగా గ్రామంలో అర్హులైన లబ్ధిదారులకు ఇందిరమ్మ ఇళ్ల మంజూరు పత్రాలను కూడా ఈరోజు అందజేశారు. ప్రభుత్వం చేపడుతున్న సంక్షేమ, గృహ నిర్మాణ కార్యక్రమాల ద్వారా అర్హులైన పేద కుటుంబాలకు సొంతింటి కల సాకారం అవుతోందని నాయకులు పేర్కొన్నారు.
గ్రామీణ ప్రాంతాల్లో మౌలిక వసతుల అభివృద్ధితో పాటు మహిళలు, పేద కుటుంబాలకు సంక్షేమ పథకాల ప్రయోజనాలు అందేలా ప్రభుత్వం చర్యలు తీసుకుంటోందని తెలిపారు. మంజూరైన మహిళా భవనాల నిర్మాణ పనులు త్వరగా ప్రారంభించి పూర్తి చేయాలని గ్రామస్థులు కోరారు.
