ఇందల్వాయి: సేవాలాల్–జగదాంబ దేవి గద్దెను సందర్శించిన జాతీయ ఎస్టీ కమిషన్ సభ్యుడు హుస్సేన్ నాయక్
గద్దె భూమికి సంబంధించిన పత్రాలు సమర్పించాలని బంజారా సేవా సమితి నాయకులకు సూచన…
త్రిశూల్ న్యూస్ ఇందల్వాయి మండల్ రిపోర్టర్ వైకుంఠం
నిజామాబాద్ జిల్లా ఇందల్వాయి మండలం తిర్మన్‌పల్లి శివారులో జాతీయ రహదారి 44 (NH-44) పక్కన, ఇందల్వాయి బ్రిడ్జి–టోల్‌గేట్ మధ్యలో ఉన్న సేవాలాల్–జగదాంబ దేవి గద్దెను జాతీయ ఎస్టీ కమిషన్ సభ్యుడు హుస్సేన్ నాయక్ బుధవారం ఉదయం 10:40 గంటలకు సందర్శించారు. ఈ సందర్భంగా గద్దె వద్ద కొబ్బరికాయ కొట్టి ప్రత్యేక పూజలు నిర్వహించారు.
అనంతరం అక్కడికి చేరుకున్న సుమారు 60 మంది బంజారా సేవా సమితి నాయకులతో ఆయన మాట్లాడారు. గద్దె భూమికి సంబంధించిన పత్రాలు, ఇతర ఆధారాలతో కూడిన దరఖాస్తును సమర్పించాలని సూచించారు.
ఈ విషయంపై బుధవారం మధ్యాహ్నం 3 గంటలకు కలెక్టర్‌తో నిర్వహించనున్న సమీక్ష సమావేశంలో ప్రస్తావించాలంటే, తమ జాతి బిడ్డలకు న్యాయం చేయాలని కోరుతూ రాతపూర్వకంగా వినతిపత్రం అందించాలని తెలిపారు. అలాగే బీబీపూర్ తండా అండర్‌ రైల్వే బ్రిడ్జి సమస్యను కూడా సమీక్ష సమావేశంలో ప్రస్తావిస్తానని హామీ ఇచ్చారు.
ఈ కార్యక్రమంలో నిజామాబాద్ బీజేపీ అధ్యక్షుడు కులాచారి దినేష్ కుమార్‌తో పాటు బంజారా సేవా సమితి నాయకులు పాల్గొన్నారు.
అనంతరం హుస్సేన్ నాయక్ సిరికొండ మండల పర్యటనకు బయలుదేరారు.
