మెంట్రాజ్‌పల్లిలో ఆడపడుచుల సంబరాల మధ్య ఎంగిలిపూల బతుకమ్మ
తెలంగాణ సంస్కృతి, సంప్రదాయాలకు ప్రతీకగా బతుకమ్మ వేడుకలు…
త్రిశూల్ న్యూస్ రిపోర్టర్ ప్రభాకర్
డిచ్‌పల్లి: నిజామాబాద్ జిల్లా డిచ్‌పల్లి మండలంలోని మెంట్రాజ్‌పల్లి గ్రామంలో ఆదివారం ఆడపడుచులు, మహిళలు, యువతుల సందడితో ఎంగిలిపూల బతుకమ్మ వేడుకలను ఘనంగా నిర్వహించారు. తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సందర్భంగా గ్రామంలోని మహిళలు వివిధ రకాల రంగురంగుల పూలను సేకరించి, అందంగా బతుకమ్మలను పేర్చారు.
అనంతరం మహిళలంతా ఒకచోట చేరి బతుకమ్మల చుట్టూ తిరుగుతూ సంప్రదాయ పాటలు పాడారు. ఆటపాటలతో ఉత్సాహంగా గడుపుతూ పండుగ సంబరాలను అంబరాన్నంటేలా జరుపుకున్నారు. ఆడపడుచుల కేరింతలు, బతుకమ్మ పాటలతో గ్రామంలో పండుగ వాతావరణం నెలకొంది.
ఆడపడుచుల ఆత్మగౌరవానికి, తెలంగాణ అస్తిత్వానికి ప్రతీకగా నిలిచే బతుకమ్మ పండుగను రాష్ట్ర ప్రభుత్వం అధికారికంగా నిర్వహిస్తోంది. ఈ నేపథ్యంలో గ్రామస్థాయిలోనూ పండుగను ఘనంగా నిర్వహించేందుకు అధికారులు అవసరమైన ఏర్పాట్లు చేపట్టారు. బతుకమ్మలు ఆడుకునే ప్రదేశంలో ఏర్పాట్లు చేయడంతో మహిళలు ఆనందోత్సాహాల మధ్య వేడుకల్లో పాల్గొన్నారు.
బతుకమ్మ పండుగ తెలంగాణ మహిళల ఐక్యతకు, ప్రకృతిపై ప్రేమకు ప్రతీకగా నిలుస్తుందని గ్రామస్థులు పేర్కొన్నారు. తరతరాలుగా వస్తున్న తెలంగాణ సంప్రదాయాలను కాపాడుతూ, భావితరాలకు అందించడంలో ఇలాంటి పండుగలు కీలక పాత్ర పోషిస్తాయని తెలిపారు.
ఈ వేడుకల్లో గ్రామ ప్రజలు, ప్రజాప్రతినిధులు, మహిళలు, యువతీ యువకులు పెద్ద సంఖ్యలో పాల్గొని బతుకమ్మ సంబరాలను విజయవంతం చేశారు.
