భూ వివాదం నేపథ్యంలో జేసీబీతో ఇంటి కూల్చివేత.. రూ.10 లక్షల నష్టం!
నోటీసులు ఇవ్వకుండానే ఇల్లు కూల్చివేశారని బాధితుడి ఆరోపణ
జట్టు మహారాజ్, మణిక్యం, జేసీబీ డ్రైవర్‌పై చర్యలు తీసుకోవాలని పోలీస్ కమిషనర్‌కు ఫిర్యాదు…
నిజామాబాద్: మోపాల్ మండలం సిర్పూర్ గ్రామ శివారులో భూ వివాదం తీవ్ర ఉద్రిక్తతకు దారితీసింది. తనకు చెందిన భూమిలో నిర్మించుకున్న నాలుగు గదుల ఇంటిని కొందరు వ్యక్తులు జేసీబీతో కూల్చివేశారని ముదక్‌పల్లి గ్రామానికి చెందిన తిప్పులూరి నారాయణరెడ్డి (53) ఆరోపించారు. ఈ ఘటనలో సుమారు రూ.10 లక్షల ఆస్తి నష్టం వాటిల్లిందని పేర్కొంటూ సోమవారం నిజామాబాద్ పోలీస్ కమిషనర్‌కు ప్రజావాణిలో ఫిర్యాదు చేశారు.
నారాయణరెడ్డి తెలిపిన వివరాల ప్రకారం.. సిర్పూర్ శివారులోని సర్వే నంబర్ 602/140 పరిధిలో తాళ్ల పద్మాబాయి వద్ద నుంచి 2006 జూన్ 26న ఒక ఎకరం భూమిని కొనుగోలు చేసినట్లు తెలిపారు. 2008లో అదే స్థలంలో నాలుగు గదులతో ఇల్లు నిర్మించుకున్నానని పేర్కొన్నారు. అయితే ఇదే సర్వే నంబర్ పరిధిలో ఐదు ఎకరాల ప్రభుత్వ భూమి కేటాయింపు జరిగిందంటూ జట్టు మహారాజ్ అనే వ్యక్తి పేర్కొనడంతో ఇరువర్గాల మధ్య భూ వివాదం తలెత్తినట్లు ఆరోపించారు.
ఈ వివాదంపై 2024, 2025 సంవత్సరాల్లో రెండుసార్లు భూ సర్వే నిర్వహించినప్పటికీ సమస్య పరిష్కారం కాలేదని తెలిపారు. అంతేకాకుండా కొందరు వ్యక్తులు తనను, వ్యవసాయ కూలీలను బెదిరింపులకు గురిచేశారని ఆరోపించారు.
ఈ క్రమంలో అక్టోబర్ 31న ఉదయం జట్టు మహారాజ్, మణిక్యం, జేసీబీ డ్రైవర్ సుధాకర్‌తో పాటు మరికొందరు వ్యక్తులు వచ్చి ఎలాంటి ముందస్తు సమాచారం లేదా నోటీసులు ఇవ్వకుండా తన నాలుగు గదుల ఇంటిని జేసీబీతో కూల్చివేశారని ఫిర్యాదులో పేర్కొన్నారు. ఎనిమిదేళ్లుగా నివాసం ఉంటున్న ఇంటిని ధ్వంసం చేయడంతో రూ.10 లక్షల మేర నష్టం వాటిల్లిందని ఆవేదన వ్యక్తం చేశారు.
ఈ భూ వివాదం వెనుక కొందరు రాజకీయ నాయకులు, ఇతర వ్యక్తుల ప్రమేయం ఉందని కూడా నారాయణరెడ్డి అనుమానం వ్యక్తం చేశారు. అయితే ఈ ఆరోపణలపై సంబంధిత వ్యక్తుల వివరణ, అధికారుల స్పందన తెలియాల్సి ఉంది.
తన ఇంటిని కూల్చివేసిన వారిపై సమగ్ర విచారణ జరిపి చట్టపరమైన చర్యలు తీసుకోవాలని, తనకు న్యాయం చేయడంతో పాటు కుటుంబానికి రక్షణ కల్పించాలని పోలీస్ కమిషనర్‌ను బాధితుడు కోరారు.
అసలు ఎకరం భూమి హక్కులు ఎవరివి? ఐదు ఎకరాల ప్రభుత్వ భూమి కేటాయింపు వెనుక వాస్తవాలేమిటి? ఇంటి కూల్చివేతకు కారణాలేంటి? బాధితుడి ఆరోపణలపై పోలీసులు ఎలాంటి చర్యలు తీసుకుంటారన్నది ఇప్పుడు చర్చనీయాంశంగా మారింది.
