ప్రభుత్వ జూనియర్ కళాశాలలో ఆన్‌జాబ్ ట్రైనింగ్ కార్యక్రమం ప్రారంభం…
త్రిశూల్ న్యూస్ రిపోర్టర్ కూనే జితేందర్
భీంగల్, నవంబర్ 2: భీంగల్ ప్రభుత్వ జూనియర్ కళాశాలలో విద్యార్థులకు ఆన్‌జాబ్ ట్రైనింగ్ (On Job Training) కార్యక్రమాన్ని సోమవారం ప్రారంభించారు. ఈ సందర్భంగా కళాశాల ప్రిన్సిపాల్ చెరుకుపల్లి జయపాల్ రెడ్డి మాట్లాడుతూ.. విద్యార్థులు తమ గ్రూపులకు సంబంధించిన పాఠ్యాంశాల ఆధారంగా క్షేత్రస్థాయిలో శిక్షణ పొందాలని సూచించారు.
ఈ శిక్షణలో భాగంగా బ్యాంకింగ్ రంగం, వ్యవసాయ సహకార సంఘాలు, ఫిషరీస్ కేంద్రాలు తదితర సంస్థలను సందర్శించి ఆయా రంగాలకు సంబంధించిన ప్రత్యక్ష అనుభవాన్ని పొందే అవకాశం ఉంటుందని తెలిపారు. అధ్యాపకులు ఇచ్చిన సూచనల ప్రకారం శిక్షణను పూర్తి చేయాలని, ఆయా సంస్థల్లోని అధికారుల నుంచి సమాచారాన్ని శ్రద్ధగా తెలుసుకొని హ్యాండ్‌బుక్‌లో నమోదు చేసుకోవాలని సూచించారు.
క్షేత్రస్థాయిలో నేర్చుకున్న అంశాలు భవిష్యత్తులో ఉద్యోగ అవకాశాలకు, నిత్యజీవితానికి ఎంతగానో ఉపయోగపడతాయని పేర్కొన్నారు. శిక్షణతో పాటు మార్చిలో జరగనున్న ఇంటర్మీడియట్ వార్షిక పరీక్షలకు కూడా విద్యార్థులు సమర్థవంతంగా సిద్ధం కావాలని తెలిపారు. విద్యార్థులు ఉన్నత విద్యను అభ్యసించి కళాశాలకు, తల్లిదండ్రులకు, అధ్యాపక బృందానికి మంచి పేరు తీసుకురావాలని ఆకాంక్షించారు.
ఈ కార్యక్రమంలో ఫిషరీస్ గ్రూప్ అధ్యాపకులు ఎస్. శ్రీనివాస్, అకౌంటింగ్ అండ్ ట్యాలీ అధ్యాపకులు ధన్‌పాల్ క్రాంతి కృష్ణ, ఆఫీస్ అసిస్టెంట్‌షిప్ అధ్యాపకులు శోభారాణి, ఎస్. శ్రీకాంత్ తదితర అధ్యాపకులు పాల్గొని విద్యార్థులకు ఆన్‌జాబ్ ట్రైనింగ్‌పై పలు సూచనలు చేశారు. ఈ కార్యక్రమంలో కళాశాల అధ్యాపక బృందం, విద్యార్థినీ విద్యార్థులు పాల్గొన్నారు.
