దేవక్కపేటలో గ్రామ సంఘం మహిళా భవన నిర్మాణానికి భూమిపూజ
రూ.10 లక్షలతో నూతన భవన నిర్మాణం.. మరో రూ.1.50 లక్షలతో మరుగుదొడ్ల నిర్మాణానికి నిధులు…
త్రిశూల్ న్యూస్ రిపోర్టర్ కూనే జితేందర్
భీమ్‌గల్: నిజామాబాద్ జిల్లా భీమ్‌గల్ మండలంలోని దేవక్కపేట గ్రామంలో రూ.10 లక్షల వ్యయంతో నిర్మించనున్న గ్రామ సంఘం మహిళా వీవో నూతన భవన నిర్మాణానికి ఎంపీడీవో గంగుల సంతోష్ కుమార్ భూమిపూజ నిర్వహించారు.
ఈ సందర్భంగా ఎంపీడీవో మాట్లాడుతూ.. ప్రభుత్వం ప్రతిష్టాత్మకంగా చేపడుతున్న గ్రామ సంఘ భవనాల నిర్మాణ పనులను త్వరితగతిన పూర్తి చేయాలని పాలకవర్గానికి సూచించారు. ఈ భవనానికి స్వచ్ఛ భారత్ నిధుల నుంచి రూ.1.50 లక్షలతో మరుగుదొడ్ల నిర్మాణానికి నిధులు మంజూరు చేయనున్నట్లు తెలిపారు.
మహిళలు ఆర్థికంగా అభివృద్ధి చెందడంతో పాటు గ్రామాభివృద్ధి కార్యక్రమాల్లో చురుకుగా పాల్గొనాలని సూచించారు. ముఖ్యంగా ఇంకుడు గుంతల నిర్మాణంలో మహిళలు స్వచ్ఛందంగా ముందుకు వచ్చి కీలక పాత్ర పోషించాలని పిలుపునిచ్చారు.
అనంతరం గ్రామంలో కొత్తగా మంజూరైన ఏడుగురు లబ్ధిదారులకు ఇందిరమ్మ ఇళ్ల మంజూరు పత్రాలను ఎంపీడీవో అందజేశారు.
ఈ కార్యక్రమంలో గ్రామ సర్పంచ్ పూజ అజయ్, ఉపసర్పంచ్, ఏపీవో జి. నర్సయ్య, సీసీ ఐకేపీ రఘు, టీఏ గణేష్, పంచాయతీ కార్యదర్శి అజయ్, గ్రామపంచాయతీ పాలకవర్గ సభ్యులు, గ్రామ సంఘం మహిళలు, గ్రామాభివృద్ధి కమిటీ సభ్యులు, ప్రజాప్రతినిధులు పాల్గొన్నారు.
