ఎన్నో ఏళ్ల నిరీక్షణకు తెర.. ఇందల్వాయి ROB నిర్మాణానికి ముందడుగు!
రైల్వే గేటు వద్ద ట్రాఫిక్ కష్టాలకు త్వరలో చెక్?
సర్వే చేపట్టిన రైల్వే అధికారులు.. త్వరలో డీపీఆర్ సిద్ధం చేసి ప్రభుత్వానికి ప్రతిపాదనలు…
త్రిశూల్ న్యూస్ ఇందల్వాయి మండల్ రిపోర్టర్ వైకుంఠం
నిజామాబాద్ జిల్లా ఇందల్వాయి ప్రజల ఎన్నో ఏళ్ల నిరీక్షణకు తెరపడే సూచనలు కనిపిస్తున్నాయి. ఇందల్వాయి రైల్వే గేటు వద్ద రైల్వే ఓవర్ బ్రిడ్జి (ROB) నిర్మాణానికి ఎట్టకేలకు ముందడుగు పడింది.
ఇందల్వాయి రైల్వే గేటు వద్ద నిత్యం ట్రాఫిక్ జామ్ ఏర్పడుతుండటంతో వాహనదారులు, స్థానిక ప్రజలు తీవ్ర ఇబ్బందులు ఎదుర్కొంటున్నారు. రైళ్ల రాకపోకల సమయంలో గేటు మూసివేయడంతో వాహనాలు భారీగా నిలిచిపోతున్నాయి. అత్యవసర సమయాల్లోనూ ప్రజలు ఇబ్బందులు పడుతున్నారు. తరచూ ప్రమాదాలు చోటుచేసుకుంటుండటంతో ఇక్కడ ROB నిర్మించాలని ప్రజలు, ప్రజాప్రతినిధులు ఎన్నో ఏళ్లుగా డిమాండ్ చేస్తున్నారు.
ఈ నేపథ్యంలో రైల్వే అధికారులు వంతెన నిర్మాణానికి సంబంధించి ప్రాథమిక సర్వే చేపట్టారు. ప్రతిపాదిత నిర్మాణ ప్రాంతాన్ని క్షేత్రస్థాయిలో పరిశీలించి కొలతలు సేకరించారు. త్వరలోనే సమగ్ర ప్రాజెక్టు నివేదిక (DPR) సిద్ధం చేసి, తదుపరి అనుమతుల కోసం ప్రభుత్వానికి ప్రతిపాదనలు పంపనున్నట్లు అధికారులు వెల్లడించారు.
ఎన్నో ఏళ్లుగా ఎదురుచూస్తున్న ROB నిర్మాణానికి సర్వే రూపంలో ముందడుగు పడటంతో ఇందల్వాయి ప్రజల్లో ఆశలు చిగురిస్తున్నాయి. ఇకనైనా వంతెన నిర్మాణ పనులు వేగవంతం చేసి, ట్రాఫిక్ సమస్యకు శాశ్వత పరిష్కారం చూపాలని స్థానికులు కోరుతున్నారు.
