క్యాన్సర్‌పై చిన్నారి విజయం.. కార్-టీ చికిత్సతో కొత్త ఆశలు!
కీమోథెరపీ, బోన్ మ్యారో ట్రాన్స్‌ప్లాంట్ విఫలమైనా.. అత్యాధునిక చికిత్సతో మెరుగుపడిన ఆరోగ్యం…
త్రిశూల్ న్యూస్ రిపోర్టర్ హరీష్
రక్త క్యాన్సర్‌తోబాధపడుతున్న ఓ చిన్నారికి అత్యాధునిక కార్-టీ సెల్ థెరపీ (CAR-T Cell Therapy) ద్వారా చికిత్స అందించి వైద్యులు కొత్త ఆశలు నింపారు. కీమోథెరపీ, బోన్ మ్యారో ట్రాన్స్‌ప్లాంట్, ఇమ్యూనోథెరపీ, టార్గెటెడ్ థెరపీ వంటి పలు చికిత్సలు చేసినప్పటికీ వ్యాధి అదుపులోకి రాకపోవడంతో, చివరి ప్రయత్నంగా అందించిన కార్-టీ చికిత్స సానుకూల ఫలితాలను ఇచ్చినట్లు వైద్యులు వెల్లడించారు.
వివరాల్లోకి వెళితే.. విద్య అనే చిన్నారి అక్యూట్ లింఫోబ్లాస్టిక్ లుకేమియా (ALL) అనే రక్త క్యాన్సర్‌తో బాధపడుతోంది. వ్యాధి నివారణకు పలు రకాల చికిత్సలు అందించినప్పటికీ ఆశించిన ఫలితం కనిపించలేదు. దీంతో కుటుంబ సభ్యులు తీవ్ర ఆందోళనకు గురయ్యారు.
ఈ నేపథ్యంలో అత్యాధునిక వైద్య విధానమైన కార్-టీ సెల్ థెరపీ ద్వారా చికిత్స అందించాలని వైద్యులు నిర్ణయించారు. ఈ చికిత్సలో రోగి శరీరంలోని టీ-కణాలను సేకరించి, ప్రయోగశాలలో జన్యుపరంగా మార్పులు చేసి క్యాన్సర్ కణాలను గుర్తించి నాశనం చేసే సామర్థ్యాన్ని పెంచుతారు. అనంతరం మార్పు చేసిన కణాలను తిరిగి రోగి శరీరంలోకి ప్రవేశపెడతారు.
వైద్యుల ప్రత్యేక పర్యవేక్షణలో చిన్నారి విద్యకు ఈ చికిత్స అందించగా, ప్రస్తుతం ఆమె ఆరోగ్య పరిస్థితి మెరుగుపడుతున్నట్లు వైద్యులు తెలిపారు. దీంతో కుటుంబ సభ్యుల్లో కొత్త ఆశలు చిగురించాయి.
ఈ సందర్భంగా వైద్యులు మాట్లాడుతూ.. రక్త క్యాన్సర్ చికిత్సలో కార్-టీ సెల్ థెరపీ ఒక కీలకమైన ముందడుగు అని పేర్కొన్నారు. అయితే ఈ చికిత్స ప్రతి రోగికి సరిపోదని, వ్యాధి స్వభావం, రోగి ఆరోగ్య పరిస్థితిని బట్టి నిపుణులైన వైద్యులు నిర్ణయం తీసుకోవాలని సూచించారు.
అలాగే రక్త క్యాన్సర్‌కు సంబంధించిన లక్షణాలను నిర్లక్ష్యం చేయవద్దని హెచ్చరించారు. కారణం తెలియని జ్వరం, అకారణంగా బరువు తగ్గడం, తీవ్రమైన అలసట, మెడ లేదా చంకల్లో శోషరస గ్రంథులు వాపు, రక్తహీనత వంటి లక్షణాలు కనిపిస్తే వెంటనే వైద్యులను సంప్రదించి పరీక్షలు చేయించుకోవాలని సూచించారు.
కష్టతరమైన చికిత్సల అనంతరం చిన్నారి విద్య ఆరోగ్యం మెరుగుపడుతుండటం కుటుంబ సభ్యుల్లో ఆనందాన్ని నింపింది. ఆధునిక వైద్య విజ్ఞానంలో కార్-టీ వంటి వినూత్న చికిత్సా విధానాలు రక్త క్యాన్సర్ బాధితులకు కొత్త ఆశలు కల్పిస్తున్నాయని వైద్యులు పేర్కొన్నారు.
