ఈవీఎం గోదామును పరిశీలించిన కలెక్టర్ ఆశిష్ సంగ్వాన్
భద్రతా ఏర్పాట్లపై ఆరా.. నిరంతరం నిఘా కొనసాగించాలని అధికారులకు సూచన…
త్రిశూల్ న్యూస్ రిపోర్టర్ గడిల లింగం
కామారెడ్డి: జిల్లా కేంద్రంలోని ఈవీఎం గోదామును జిల్లా కలెక్టర్ ఆశిష్ సంగ్వాన్ నెలవారీ తనిఖీలో భాగంగా పరిశీలించారు. ఈ సందర్భంగా గోదాంలో ఏర్పాటు చేసిన సీసీ కెమెరాల పనితీరు, భద్రతా ఏర్పాట్లను క్షుణ్ణంగా తనిఖీ చేశారు. గోదాం వద్ద విధులు నిర్వహిస్తున్న పోలీస్ సిబ్బందితో మాట్లాడి విధుల నిర్వహణలో ఎదురవుతున్న ఇబ్బందులను అడిగి తెలుసుకున్నారు. ఈవీఎం గోదాం భద్రత విషయంలో అప్రమత్తంగా ఉండాలని, నిరంతరం నిఘా కొనసాగించాలని సంబంధిత అధికారులకు సూచించారు. ఈ తనిఖీలో అదనపు కలెక్టర్లు (రెవెన్యూ) వి.వి. విక్టర్, స్థానిక సంస్థల అదనపు కలెక్టర్ ఎన్.వై . గిరి, తహసీల్దార్ హిమబిందు, ఎన్నికల విభాగం సూపరింటెండెంట్ రాజేశ్వర్, ఆర్ అండ్ బీ శాఖ అధికారులు తదితరులు పాల్గొన్నారు.
