పండుగల వేళ అప్రమత్తంగా ఉండాలి..
రామారెడ్డి ఎస్సై మురళి సూచనలు…
త్రిశూల్ న్యూస్ రిపోర్టర్ గడిల లింగం
రామారెడ్డి: మండల ప్రజలకు దీపావళి పండుగ శుభాకాంక్షలు తెలిపిన రామారెడ్డి ఎస్సై మురళి పలు భద్రతా సూచనలు చేశారు.
పండుగల సందర్భంగా ఇతర ప్రాంతాలకు వెళ్లేవారు ఇళ్లకు తాళం వేసి వెళ్లే ముందు విలువైన వస్తువులు, నగదును వెంట తీసుకెళ్లాలని సూచించారు.
ఇంటి నుంచి ఊరికి వెళ్లే విషయాన్ని స్థానిక పోలీస్‌స్టేషన్‌కు ముందుగా తెలియజేయాలన్నారు.
ఇళ్లలో దొంగతనాలు జరగకుండా ప్రతి ఒక్కరూ సీసీ కెమెరాలను ఏర్పాటు చేసుకోవాలని కోరారు.
ద్విచక్ర వాహనాలపై ఇద్దరికి మించి ప్రయాణించరాదని, హెల్మెట్ తప్పనిసరిగా ధరించాలని సూచించారు.
మద్యం, ఇతర మత్తు పదార్థాలు సేవించి వాహనాలు నడపరాదని, కారులో ప్రయాణించేటప్పుడు సీట్‌బెల్ట్ తప్పనిసరిగా ధరించాలని తెలిపారు.
సైబర్ నేరగాళ్ల పట్ల అప్రమత్తంగా ఉండాలని, అపరిచితులను నమ్మి బ్యాంకు వివరాలు, ఓటీపీలు ఎవరికీ వెల్లడించరాదని హెచ్చరించారు.
బ్యాంకు ఖాతాలకు సంబంధించిన సందేహాలు ఉంటే నేరుగా బ్యాంకుకు వెళ్లి వివరాలు తెలుసుకోవాలని సూచించారు.
పండుగలను ప్రజలందరూ సురక్షితంగా జరుపుకోవాలని, ప్రజల రక్షణకు పోలీస్ సిబ్బంది అందుబాటులో ఉంటారని ఎస్సై మురళి తెలిపారు.
అత్యవసర పరిస్థితుల్లో వెంటనే డయల్ 100కు ఫోన్ చేసి పోలీసుల సహాయం పొందాలని మండల ప్రజలకు సూచించారు.
