విద్యార్థులకు ఆధార్, యూ-డైస్ ప్లస్ సమస్యలతో ఇబ్బందులు!
చిన్నపాటి తప్పుల సవరణకూ విద్యార్థులు, తల్లిదండ్రుల అవస్థలు.. ప్రభుత్వమే శాశ్వత పరిష్కారం చూపాలి: డా. షఫీ షేక్…
త్రిశూల్ న్యూస్ రిపోర్టర్ కూనే జితేందర్
భీంగల్ : విద్యార్థుల ఆధార్ కార్డులు, జనన ధ్రువీకరణ పత్రాలు, యూ-డైస్ ప్లస్ (UDISE+) వివరాల్లో అక్షర దోషాలు, పేర్లలో తేడాలు, పుట్టిన తేదీల్లో పొరపాట్లు వంటి సమస్యలతో విద్యార్థులు, తల్లిదండ్రులు తీవ్ర ఇబ్బందులు ఎదుర్కొంటున్నారని లిటిల్ ఫ్లవర్ హైస్కూల్ డైరెక్టర్ డా. షఫీ షేక్ ఆందోళన వ్యక్తం చేశారు.
విద్యార్థుల భవిష్యత్తుకు సంబంధించిన కీలకమైన పత్రాల్లో చిన్నపాటి తప్పులను సరిచేయించుకోవడానికి సైతం తల్లిదండ్రులు ఆధార్ కేంద్రాలు, ప్రభుత్వ కార్యాలయాలు, పాఠశాలల చుట్టూ తిరగాల్సిన పరిస్థితి నెలకొందని తెలిపారు.
విద్యార్థుల సమయం, తల్లిదండ్రుల డబ్బు వృథా!
విద్యార్థుల వివరాల్లో చిన్నపాటి తప్పులు ఉన్నప్పటికీ వాటిని సరిచేయించుకోవడానికి రోజుల తరబడి సమయం పడుతోందని, దీనివల్ల విద్యార్థుల చదువుకు ఆటంకం కలుగుతోందని పేర్కొన్నారు. ముఖ్యంగా పదో తరగతి పరీక్షల నమోదు సమయంలో పేర్లు, పుట్టిన తేదీలు, ఇతర వివరాల్లో తేడాలు ఉంటే విద్యార్థులు, తల్లిదండ్రులు తీవ్ర ఆందోళనకు గురవుతున్నారని అన్నారు.
పాఠశాలలకు సవరణ అధికారాలు కల్పించాలి!
ప్రభుత్వ నిబంధనలకు అనుగుణంగా తగిన ధ్రువీకరణ పత్రాలను పరిశీలించిన అనంతరం పాఠశాల ప్రధానోపాధ్యాయుల ద్వారా యూ-డైస్ ప్లస్ వివరాల్లో చిన్నపాటి తప్పులను సరిచేసుకునే అవకాశం కల్పించాలని డా. షఫీ షేక్ ప్రభుత్వాన్ని కోరారు. అలాగే మండల, జిల్లా విద్యాశాఖ అధికారులు ప్రత్యేక చొరవ తీసుకుని విద్యార్థుల సమస్యలను త్వరితగతిన పరిష్కరించాలని విజ్ఞప్తి చేశారు.
ప్రత్యేక సవరణ శిబిరాలు ఏర్పాటు చేయాలి!
విద్యార్థుల ఆధార్ కార్డులు, జనన ధ్రువీకరణ పత్రాలు, పాఠశాల రికార్డుల్లో నమోదైన వివరాల మధ్య ఉన్న తేడాలను సరిచేసేందుకు మండల స్థాయిలో ప్రత్యేక సవరణ శిబిరాలు ఏర్పాటు చేయాలని సూచించారు. విద్యాశాఖతో పాటు సంబంధిత ప్రభుత్వ విభాగాలు సమన్వయంతో పనిచేసి విద్యార్థులకు ఇబ్బందులు లేకుండా శాశ్వత పరిష్కారం చూపాలని కోరారు.
చిన్నపాటి అక్షర దోషాల కారణంగా విద్యార్థుల భవిష్యత్తు ప్రశ్నార్థకంగా మారకూడదని, విద్యార్థుల చదువు, సమయం, తల్లిదండ్రుల శ్రమను కాపాడటం ప్రభుత్వ బాధ్యత అని డా. షఫీ షేక్ పేర్కొన్నారు.
