గాంధీజీకి నిత్య పూజలు… నర్సింగ్‌పూర్‌లో ప్రత్యేక ఆచారం…
త్రిశూల్ న్యూస్ రిపోర్టర్ ప్రభాకర్
గాంధీ జయంతి అనగానే గాంధీ విగ్రహానికి నివాళులు అర్పిస్తారు. కానీ నిజామాబాద్ జిల్లాలోని ఓ గ్రామంలో మాత్రం మహాత్మా గాంధీని దైవంగా భావిస్తూ నిత్యం పూజలు నిర్వహిస్తున్నారు.
నిజామాబాద్ జిల్లా డిచ్‌పల్లి మండలం నర్సింగ్‌పూర్ గ్రామస్తులు అనాదిగా వస్తున్న ఈ ప్రత్యేక ఆచారాన్ని ఇప్పటికీ కొనసాగిస్తున్నారు. గ్రామంలో ఏ శుభకార్యం జరిగినా తొలి దైవంగా మహాత్మా గాంధీని పూజించడం ఇక్కడ ఆనవాయితీగా వస్తోంది.
గ్రామంలో పెళ్లిళ్లు, పేరంటాలు, పండుగలు లేదా ఇతర శుభకార్యాలు ఏవి జరిగినా… ముందుగా గాంధీజీ విగ్రహానికి పూలమాల వేసి, కొబ్బరికాయ కొట్టి పూజలు చేయడం తప్పనిసరి అని గ్రామస్తులు చెబుతున్నారు.
ఇతర ప్రాంతాలకు భిన్నంగా నర్సింగ్‌పూర్ గ్రామస్తులు మహాత్మా గాంధీని దైవంగా భావిస్తూ ఈ ఆచారాన్ని కొనసాగిస్తున్నారు. చూసేవారికి ఇది కాస్త ఆశ్చర్యంగా అనిపించినా… గ్రామస్తులు మాత్రం తరతరాలుగా వస్తున్న ఈ సంప్రదాయాన్ని తూచా తప్పకుండా పాటిస్తున్నారు.
దేశవ్యాప్తంగా గాంధీ జయంతి రోజున మహాత్మా గాంధీని స్మరించుకుంటారు. కానీ నర్సింగ్‌పూర్ గ్రామస్తులు మాత్రం నిత్యం ఆయనను స్మరించుకుంటూ పూజలు నిర్వహిస్తున్నారు. దేశ స్వాతంత్ర్యం కోసం అహర్నిశలు పోరాడిన మహాత్మా గాంధీని దైవంతో సమానంగా భావిస్తూ… తమ గౌరవాన్ని, దేశభక్తిని చాటుకుంటున్నారు నర్సింగ్‌పూర్ గ్రామస్తులు.
