కేసీఆర్ పదేళ్ల పాలన తెలంగాణలో స్వర్ణయుగానికి నాంది
అట్టహాసంగా బీఆర్ఎస్ ఆధ్వర్యంలో దశాబ్ది పాలన ఉత్సవాలు
రేవంత్ రెడ్డి పాలన నీతి నియమాలు లేని రాతియుగం: బీఆర్ఎస్ జిల్లా అధ్యక్షుడు జీవన్ రెడ్డి.
నిజామాబాద్, అక్టోబర్ 9: తెలంగాణ రాష్ట్ర సాధకుడు, తొలి ముఖ్యమంత్రి కేసీఆర్ పదేళ్ల పాలన రాష్ట్రంలో స్వర్ణయుగానికి నాంది పలికిందని బీఆర్ఎస్ నిజామాబాద్ జిల్లా అధ్యక్షుడు, ఆర్మూర్ మాజీ ఎమ్మెల్యే ఆశన్నగారి జీవన్ రెడ్డి అన్నారు. బీఆర్ఎస్ వర్కింగ్ ప్రెసిడెంట్ కేటీఆర్ పిలుపు మేరకు శుక్రవారం నిజామాబాద్ జిల్లా కేంద్రంలోని బీఆర్ఎస్ పార్టీ కార్యాలయంలో కేసీఆర్ పదేళ్ల పాలన విజయాలను గుర్తుచేసుకుంటూ దశాబ్ది ఉత్సవాలను ఘనంగా నిర్వహించారు.
ఈ సందర్భంగా జీవన్ రెడ్డి మాట్లాడుతూ, కేసీఆర్ పాలనలో జరిగిన చెడు ఏమీ లేదని, కాంగ్రెస్ పాలనలో జరిగిన మంచి ఏమీ లేదని వ్యాఖ్యానించారు. కేసీఆర్ హయాంలో దేశమే అబ్బురపడేలా అభివృద్ధి, సంక్షేమ పథకాలు అమలయ్యాయని, ప్రస్తుత కాంగ్రెస్ ప్రభుత్వ హయాంలో అవినీతి, కుంభకోణాలు చోటుచేసుకుంటున్నాయని ఆయన ఆరోపించారు.
ప్రజలకు చేరువైన పాలన.. కొత్త జిల్లాల ఏర్పాటు
ప్రజలకు పాలనను చేరువ చేయడంలో బీఆర్ఎస్ ప్రభుత్వం విజయం సాధించిందని జీవన్ రెడ్డి పేర్కొన్నారు. ప్రజల సౌలభ్యం కోసం కొత్త జిల్లాలు, మండలాలు, రెవెన్యూ డివిజన్లు ఏర్పాటు చేశామని తెలిపారు. తండాలను గ్రామ పంచాయతీలుగా మార్చిన ఘనత కేసీఆర్ ప్రభుత్వానిదేనని అన్నారు.
జిల్లా కేంద్రాల్లో అన్ని ప్రభుత్వ శాఖలు ఒకే చోట పనిచేసేలా సమీకృత కలెక్టరేట్లు, పోలీసు కార్యాలయాలు, అధికారుల నివాస సముదాయాలను ఏర్పాటు చేశామని గుర్తుచేశారు. నియోజకవర్గాల్లో ఎమ్మెల్యే క్యాంపు కార్యాలయాలను నిర్మించడంతో పాటు, అన్ని మంత్రిత్వ శాఖలు ఒకే చోట పనిచేసేలా ఆధునిక హంగులతో నూతన సచివాలయాన్ని నిర్మించామని పేర్కొన్నారు.
ప్రజలకు పోలీసు సేవలను మరింత చేరువ చేయడానికి కొత్త పోలీస్ కమిషనరేట్లు, పోలీస్ జిల్లాలు, పోలీస్ స్టేషన్లు ఏర్పాటు చేశామని తెలిపారు. పోలీసు శాఖలో పని విభజనతో పాటు, అన్ని పోలీస్ స్టేషన్లలో రిసెప్షన్ వ్యవస్థను ప్రవేశపెట్టినట్లు వివరించారు.
ఆర్టీసీ, మున్సిపాలిటీలు, గ్రామీణాభివృద్ధి
ఆర్టీసీని నష్టాల నుంచి గట్టెక్కించేందుకు కార్గో సేవలను ప్రారంభించామని, ఆర్టీసీని ప్రభుత్వంలో విలీనం చేయడం చారిత్రాత్మక నిర్ణయమని జీవన్ రెడ్డి అన్నారు. భూముల రిజిస్ట్రేషన్ల కోసం ధరణి పోర్టల్‌ను అందుబాటులోకి తీసుకువచ్చామని పేర్కొన్నారు.
ఉమ్మడి రాష్ట్రంలో తెలంగాణలో 52 మున్సిపాలిటీలు ఉండగా, బీఆర్ఎస్ హయాంలో మరో 76 మున్సిపాలిటీలను ఏర్పాటు చేశామని, మున్సిపల్ కార్పొరేషన్ల సంఖ్యను కూడా పెంచామని తెలిపారు. స్థానిక సంస్థల ప్రజాప్రతినిధుల గౌరవ వేతనాలను పెంచడంతో పాటు, గ్రామాల పరిశుభ్రత కోసం ట్రాక్టర్, ట్రాలీ, ట్యాంకర్‌లను అందించామని అన్నారు.
ప్రతి గ్రామంలో పల్లె ప్రకృతి వనాలు, వైకుంఠధామాలు ఏర్పాటు చేశామని, పర్యావరణ పరిరక్షణకు గ్రీన్ బడ్జెట్ ద్వారా ప్రాధాన్యత ఇచ్చామని వివరించారు.
పరిశ్రమలు, వైద్య రంగంలో అభివృద్ధి
టీఎస్‌ఐపాస్ విధానం అమల్లోకి వచ్చిన తర్వాత రాష్ట్రానికి పెద్ద ఎత్తున పెట్టుబడులు వచ్చాయని జీవన్ రెడ్డి తెలిపారు. పరిశ్రమల ఏర్పాటుకు అనుమతులను సులభతరం చేయడం ద్వారా యువతకు ఉద్యోగ, ఉపాధి అవకాశాలు పెరిగాయని పేర్కొన్నారు.
వైద్య రంగంలోనూ గణనీయమైన మార్పులు తీసుకొచ్చామని అన్నారు. జిల్లా ప్రభుత్వ ఆసుపత్రుల్లో పేదలకు వైద్య పరీక్షలు అందించేందుకు డయాగ్నొస్టిక్ హబ్‌లను ఏర్పాటు చేశామని, మెడికల్ కాలేజీల సంఖ్యను పెంచామని తెలిపారు. ఎంబీబీఎస్ సీట్లు పెరగడంతో తెలంగాణ విద్యార్థులకు ప్రయోజనం కలిగిందని పేర్కొన్నారు.
రైతు సంక్షేమానికి పెద్దపీట
రైతుల సంక్షేమానికి కేసీఆర్ ప్రభుత్వం అధిక ప్రాధాన్యత ఇచ్చిందని జీవన్ రెడ్డి అన్నారు. రైతు బంధు పథకం ద్వారా పంట పెట్టుబడి సాయం అందించామని, రైతు కుటుంబాలకు ఆర్థిక భరోసా కల్పించేందుకు రైతు బీమా పథకాన్ని అమలు చేశామని తెలిపారు.
వ్యవసాయానికి 24 గంటల ఉచిత విద్యుత్ సరఫరా, అర్హులైన రైతులకు పంట రుణమాఫీ, సాగునీటి ప్రాజెక్టుల నిర్మాణం వంటి కార్యక్రమాలను చేపట్టామని వివరించారు. కాళేశ్వరం, పాలమూరు–రంగారెడ్డి వంటి భారీ ఎత్తిపోతల ప్రాజెక్టులతో సాగునీటి సౌకర్యాలను విస్తరించేందుకు కృషి చేశామని అన్నారు.
మిషన్ కాకతీయ ద్వారా చెరువుల పునరుద్ధరణ చేపట్టామని, రాష్ట్రవ్యాప్తంగా 2,500కు పైగా రైతు వేదికలను నిర్మించామని తెలిపారు. గ్రామస్థాయిలో ఐకేపీ, పీఏసీఎస్ కేంద్రాల ద్వారా మద్దతు ధరకు ధాన్యం కొనుగోలు వ్యవస్థను బలోపేతం చేశామని పేర్కొన్నారు.
నిజామాబాద్ జిల్లాలో ఎస్సారెస్పీ రివర్స్ పంపింగ్ ద్వారా సాగునీటి సౌకర్యాలను మెరుగుపరిచామని, గుత్ప ప్రాజెక్టు ద్వారా నీటిని విడుదల చేసి రైతులకు అండగా నిలిచామని జీవన్ రెడ్డి తెలిపారు.
సంక్షేమ పథకాలతో పేదలకు అండ
ఆసరా పింఛన్లు, కల్యాణలక్ష్మి, షాదీముబారక్, మిషన్ భగీరథ వంటి పథకాల ద్వారా ప్రజలకు ప్రయోజనం చేకూర్చామని జీవన్ రెడ్డి అన్నారు. ప్రతి ఇంటికీ తాగునీరు అందించేందుకు మిషన్ భగీరథను అమలు చేశామని, పేదింటి ఆడబిడ్డల వివాహాలకు ఆర్థిక సాయం అందించామని తెలిపారు.
దళితబంధు పథకం ద్వారా దళిత కుటుంబాలకు ఆర్థిక సహాయం అందించామని, రజకులు, నాయీబ్రాహ్మణులు, గౌడ కులస్తులు తదితర వర్గాల సంక్షేమానికి ప్రత్యేక కార్యక్రమాలు చేపట్టామని పేర్కొన్నారు. గురుకుల విద్యా వ్యవస్థను విస్తరించడంతో పాటు, వెనుకబడిన వర్గాలకు విద్యా అవకాశాలు కల్పించేందుకు చర్యలు తీసుకున్నామని తెలిపారు.
కేసీఆర్ పదేళ్ల పాలనలో అమలైన పథకాలు, అభివృద్ధి కార్యక్రమాలు ఎన్నో ఉన్నాయని పేర్కొన్న జీవన్ రెడ్డి, తెలంగాణ రాష్ట్ర రూపురేఖలను మార్చిన బీఆర్ఎస్ పాలన మళ్లీ రావాలని ఆకాంక్షించారు. కాంగ్రెస్ ప్రభుత్వ విధానాలను ప్రజలు వ్యతిరేకించాలని, తిరిగి కేసీఆర్ నాయకత్వంలో తెలంగాణ అభివృద్ధి పథంలో ముందుకు సాగేందుకు పార్టీ శ్రేణులు కృషి చేయాలని పిలుపునిచ్చారు.
ఘనంగా దశాబ్ది ఉత్సవాలు
నిజామాబాద్ జిల్లా కేంద్రంలో నిర్వహించిన దశాబ్ది ఉత్సవాలకు జిల్లా నలుమూలల నుంచి బీఆర్ఎస్ నాయకులు, కార్యకర్తలు పెద్ద సంఖ్యలో తరలివచ్చారు. దీంతో పార్టీ జిల్లా కార్యాలయం సందడిగా మారింది. ఈ సందర్భంగా జీవన్ రెడ్డి తెలంగాణ తల్లి విగ్రహానికి పూలమాల వేసి నివాళులర్పించారు. జిల్లా వ్యాప్తంగా కేసీఆర్ చిత్రపటాలకు పాలాభిషేకాలు నిర్వహించారు.
తెలంగాణ రాష్ట్ర సాధన కోసం, జిల్లాల ఏర్పాటు కోసం ఉద్యమించిన జేఏసీ నాయకులు, ఉద్యమకారులను ఘనంగా సన్మానించారు. బార్ అసోసియేషన్ ప్రతినిధులు, జర్నలిస్టులు, ఉద్యోగులు, పెన్షనర్లు, మహిళా, యువజన సంఘాల ప్రతినిధులు, కవులు, కళాకారులు, సామాజిక కార్యకర్తలను కూడా సత్కరించారు.
కేసీఆర్ పదేళ్ల పాలనలో నిజామాబాద్ జిల్లాలో సాధించిన అభివృద్ధిని ఫ్లెక్సీలు, కరపత్రాల ద్వారా ప్రజలకు వివరించారు. జిల్లాల ఏర్పాటు వల్ల కలిగిన ప్రయోజనాలు, ప్రజల జీవితాల్లో వచ్చిన మార్పులను తెలియజేసే కార్యక్రమాలు నిర్వహించారు. యువతతో కలిసి ర్యాలీలు, బైక్ ర్యాలీలు చేపట్టి, నాయకులు బెలూన్లు ఎగురవేశారు.
ఈ కార్యక్రమంలో మాజీ మంత్రి, బాల్కొండ ఎమ్మెల్యే వేముల ప్రశాంత్ రెడ్డి, మాజీ ఎమ్మెల్యేలు బిగాల గణేష్ గుప్త, బాజిరెడ్డి గోవర్ధన్, షకీల్ ఆమీర్, మాజీ ఎమ్మెల్సీ వీజీ గౌడ్, మాజీ జడ్పీ చైర్మన్ విఠల్ రావు, బాజిరెడ్డి జగన్, మాజీ మేయర్ దండు నీతూ కిరణ్ తదితరులు పాల్గొన్నారు.
