పిల్లల్లో పెండింగ్ టీకాల కార్యక్రమాన్ని వేగవంతం చేయాలి.. రక్తహీనతను తగ్గించాలి
వైద్య ఆరోగ్యశాఖ సిబ్బందికి అధికారుల ఆదేశాలు…
నిజామాబాద్: పిల్లల్లో పెండింగ్‌లో ఉన్న టీకాలను పూర్తి చేయడంతో పాటు, రక్తహీనతను తగ్గించేందుకు ప్రత్యేక చర్యలు తీసుకోవాలని జిల్లా వైద్య ఆరోగ్యశాఖ అధికారులు సిబ్బందిని ఆదేశించారు. జిల్లా వైద్య ఆరోగ్యశాఖ పరిధిలోని వ్యాధి నిరోధక టీకాల కార్యక్రమం, రాష్ట్రీయ బాల స్వస్థ్య కార్యక్రమం (RBSK), స్పెషల్ న్యూ బార్న్ కేర్ యూనిట్ (SNCU) విభాగాల సిబ్బంది పనితీరుపై సమీక్ష నిర్వహించారు.
పెండింగ్ టీకాలపై ప్రత్యేక దృష్టి
ప్రతి నెల బుధ, శనివారాల్లో నిర్వహించాల్సిన జనని టీకాల సెషన్లలో ఎన్ని పెండింగ్‌లో ఉన్నాయో గుర్తించాలని, యూవిన్ (U-WIN) పోర్టల్‌లో నమోదు కాని వివరాలను ఎప్పటికప్పుడు నమోదు చేయాలని సూచించారు. పెండింగ్ వివరాలపై ప్రతిరోజూ ఫాలోఅప్ చేయాలని ఆదేశించారు.
పీహెచ్‌సీల పరిధిలోని 225 ఉప ఆరోగ్య కేంద్రాలు, యూపీహెచ్‌సీల పరిధిలోని 50 ఉప కేంద్రాల్లో బుధవారాలు, ప్రణాళిక ప్రకారం శనివారాల్లో జనని సెషన్లు నిర్వహించాలని తెలిపారు. అదేవిధంగా ప్రతి బుధవారం పీహెచ్‌సీలు, సీహెచ్‌సీలు, యూపీహెచ్‌సీల్లోనూ టీకాల సెషన్లు నిర్వహించాలని సూచించారు.
ప్రతి సెషన్‌కు ఒక రోజు ముందు, అంటే మంగళవారం, శుక్రవారం టీకాల కోసం అర్హులైన పిల్లల డ్యూ లిస్టులను సంబంధిత పీహెచ్‌సీ వారీగా జిల్లా ఏఎన్‌ఎంల వాట్సాప్ గ్రూపులో పోస్ట్ చేయాలని ఆదేశించారు. తద్వారా ఏఎన్‌ఎంలు, ఆశా కార్యకర్తలు సమన్వయంతో పనిచేసి, టీకాలు వేయించాల్సిన పిల్లలను సెషన్లకు తీసుకువచ్చేలా చర్యలు తీసుకోవాలని సూచించారు.
యూనివర్సల్ ఇమ్యునైజేషన్ ప్రోగ్రామ్ (UIP) విభాగంలోని ముగ్గురు సిబ్బంది ఒక్కొక్కరు ఒక డివిజన్ బాధ్యతలు తీసుకుని, టీకాల కార్యక్రమానికి సంబంధించిన అన్ని పనులను పర్యవేక్షించాలని తెలిపారు. రిఫ్రిజిరేషన్ మెకానిక్ అన్ని పీహెచ్‌సీలను క్రమం తప్పకుండా సందర్శించి, టీకాల నిల్వకు సంబంధించిన కోల్డ్ చైన్ పరికరాల్లో ఎలాంటి సమస్యలు తలెత్తకుండా చూడాలని ఆదేశించారు. రోజువారీ టూర్ డైరీని సమర్పించాలని సూచించారు.
టీకాలు వేయడంలో నైపుణ్యం లేని స్టాఫ్ నర్సులు అవసరమైన శిక్షణ పొందాలని, ప్రతి పీహెచ్‌సీ, సీహెచ్‌సీ, యూపీహెచ్‌సీలో టీకాల కార్యక్రమం సక్రమంగా నిర్వహించాలని తెలిపారు.
పౌష్టికాహార లోపం, రక్తహీనత నివారణకు చర్యలు
నిజామాబాద్ ప్రభుత్వ జనరల్ ఆసుపత్రి (జీజీహెచ్)లోని న్యూట్రిషన్ రిహాబిలిటేషన్ సెంటర్ (NRC)లో తీవ్రమైన పోషకాహార లోపం (SAM), మధ్యస్థ తీవ్రమైన పోషకాహార లోపం (MAM) ఉన్న పిల్లలను గుర్తించి, వారికి అవసరమైన పోషకాహారం, వైద్య చికిత్స అందించాలని సూచించారు. స్పెషల్ న్యూ బార్న్ కేర్ యూనిట్ (SNCU)లో చికిత్స పొందుతున్న శిశువుల ఆరోగ్య పరిరక్షణకు ప్రత్యేక శ్రద్ధ తీసుకోవాలని తెలిపారు.
తక్కువ బరువుతో జన్మించిన శిశువుల (LBW) కేసుల్లో తల్లిదండ్రులకు ఎప్పటికప్పుడు కౌన్సెలింగ్ నిర్వహించి, అవసరమైన అవగాహన కల్పించాలని సూచించారు. ఎన్‌ఆర్‌సీలో ఉన్న రికార్డుల ఆధారంగా SAM పిల్లల జాబితాను నిర్వహించాలని ఆదేశించారు.
రాష్ట్రీయ బాల స్వస్థ్య కార్యక్రమం (RBSK) మొబైల్ బృందాల ద్వారా పాఠశాలలు, అంగన్‌వాడీ కేంద్రాల్లోని పిల్లల్లో రక్తహీనతను గుర్తించి, అవసరమైన చికిత్స అందించాలని తెలిపారు. ఏ ఒక్క విద్యార్థి కూడా రక్తహీనతతో బాధపడకుండా నివారణ చర్యలు చేపట్టడంతో పాటు, పిల్లలు, తల్లిదండ్రులకు ఆరోగ్యంపై అవగాహన కల్పించాలని సూచించారు.
ఈ కార్యక్రమంలో జిల్లా ఇమ్యునైజేషన్ అధికారి డాక్టర్ అశోక్, ఎస్‌ఎన్‌సీయూ పిల్లల వైద్య నిపుణులు డాక్టర్ నిరూపరెడ్డి, ఎన్‌ఆర్‌సీ వైద్యాధికారులు డాక్టర్ స్నిగ్ధ, ఎస్‌ఓ రాజేశ్వర్, ఫార్మసీ అధికారి నారాయణ, డీపీఎచ్‌ఎన్‌ఓ సరళ, డీహెచ్‌ఈలు ఘన్‌పూర్ వెంకటేశ్వర్, మనోహర్, డీపీఓ విశాల, మేనేజర్లు సచిన్, మమత, హెచ్‌ఈఓలు వెంకటరవి, నాగరాజు, వినోద్, రఘు తదితర వైద్య ఆరోగ్యశాఖ సిబ్బంది పాల్గొన్నారు.
