ఇక ఇంటి వద్దకే మీ సేవలు.. 1100 టోల్‌ఫ్రీ నంబర్‌ విడుదల
మీ సేవా కేంద్రాలకు వెళ్లాల్సిన అవసరం లేదు.. ఇంటి నుంచే ప్రభుత్వ సేవలు పొందే అవకాశం
డోర్‌స్టెప్ డెలివరీ సేవల పోస్టర్‌ను ఆవిష్కరించిన మంత్రి శ్రీధర్ బాబు…
హైదరాబాద్: తెలంగాణ ప్రజలకు ప్రభుత్వ సేవలను మరింత సులభంగా అందించేందుకు రాష్ట్ర ప్రభుత్వం మరో కీలక ముందడుగు వేసింది. మీ సేవా కేంద్రాలు, ఆధార్ కేంద్రాల వద్దకు వెళ్లకుండా ఇంటి వద్ద నుంచే పలు ప్రభుత్వ సేవలను పొందేలా ‘మీ సేవ డోర్‌స్టెప్ డెలివరీ’ విధానాన్ని అందుబాటులోకి తీసుకువచ్చింది. ఈ సేవలకు సంబంధించిన పోస్టర్‌ను రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు ఆవిష్కరించారు.
1100 టోల్‌ఫ్రీ నంబర్‌తో సేవల బుకింగ్
ఈ విధానం ద్వారా ఆదాయం, కులం, నివాస ధ్రువీకరణ పత్రాలతో పాటు జనన, మరణ ధ్రువీకరణ పత్రాలు, ఆధార్ నమోదు, ఆధార్ వివరాల అప్‌డేట్ వంటి సేవలను ఇంటి వద్ద నుంచే పొందే అవకాశం ఉంటుంది. ఇందుకోసం ప్రజలు 1100 టోల్‌ఫ్రీ నంబర్‌కు కాల్ చేయడం లేదా మీ సేవా పౌరుల పోర్టల్ ద్వారా తమకు అనుకూలమైన సమయాన్ని బుక్ చేసుకోవచ్చు. అనంతరం మీ సేవా ప్రతినిధులు ఇంటికి వచ్చి అవసరమైన వివరాలను సేకరించి, నిబంధనల ప్రకారం నిర్ణీత రుసుముతో సేవలు అందిస్తారు.
తొలి నెలలోనే 3,885 కాల్స్
ప్రస్తుతం గ్రేటర్ హైదరాబాద్ పరిధిలోని CURE ప్రాంతాల్లో పైలట్ ప్రాజెక్టుగా ఈ సేవలను ప్రారంభించారు. ప్రారంభమైన తొలి నెలలోనే 1100 టోల్‌ఫ్రీ నంబర్‌కు 3,885 కాల్స్ రావడం ఈ సేవలపై ప్రజలకు ఉన్న ఆసక్తిని తెలియజేస్తోంది.
ప్రభుత్వ సేవలను ప్రజలకు మరింత చేరువ చేయడం, సమయం ఆదా చేయడం, కార్యాలయాల చుట్టూ తిరిగే ఇబ్బందులను తగ్గించడం ఈ విధానం ప్రధాన లక్ష్యాలు. భవిష్యత్తులో ఈ సేవలను రాష్ట్రవ్యాప్తంగా విస్తరించేందుకు అవసరమైన చర్యలు తీసుకుంటున్నట్లు మంత్రి శ్రీధర్ బాబు వెల్లడించారు.
త్రిశూల్ న్యూస్ | ప్రజల కోసం.. ప్రజల గొంతుక
