అభివృద్ధి పనుల్లో నాణ్యతే ముఖ్యం!
22, 25, 35వ డివిజన్లలో పలు అభివృద్ధి పనులకు భూమిపూజ చేసిన ఎమ్మెల్యే ధన్‌పాల్…
ఇందూరు: నగరంలోని అర్బన్ నియోజకవర్గంలో చేపడుతున్న అభివృద్ధి పనుల్లో నాణ్యతకు అత్యంత ప్రాధాన్యత ఇవ్వాలని అర్బన్ ఎమ్మెల్యే ధన్‌పాల్ సూర్యనారాయణ గుప్తా అధికారులను ఆదేశించారు. నగరంలోని 22, 25, 35వ డివిజన్లలో పలు అభివృద్ధి పనులకు ఆయన భూమిపూజ చేసి పనులను ప్రారంభించారు.
ఈ సందర్భంగా ఎమ్మెల్యే మాట్లాడుతూ.. ఇటీవల నిర్వహించిన నగరపాలక సంస్థ కౌన్సిల్ సమావేశంలో ప్రతి డివిజన్‌కు రూ.20 లక్షల చొప్పున నిధులు కేటాయిస్తూ నిర్ణయం తీసుకున్నామని తెలిపారు. ఈ నిధులతో నగరంలోని అన్ని డివిజన్లలో అభివృద్ధి పనులకు భూమిపూజలు నిర్వహిస్తున్నట్లు వెల్లడించారు. అదేవిధంగా కొన్ని డివిజన్లలో రూ.కోటి విలువైన అభివృద్ధి పనులు ఇప్పటికే ప్రారంభమయ్యాయని, మరికొన్ని ప్రాంతాల్లో త్వరలో ప్రారంభించనున్నట్లు పేర్కొన్నారు.
అమృత్-2 పథకం కింద నగరంలో భూగర్భ డ్రైనేజీ (యూజీడీ) పనులు కొనసాగుతున్నాయని తెలిపారు. ఈ పనుల్లో వేగం పెంచడంతో పాటు నాణ్యతా ప్రమాణాలను తప్పనిసరిగా పాటించాలని అధికారులకు సూచించినట్లు వెల్లడించారు. ఇటీవల సంబంధిత అధికారులతో సమీక్ష నిర్వహించి పనుల పురోగతిపై పలు సూచనలు చేసినట్లు తెలిపారు.
ఎల్‌నినో ప్రభావంతో రానున్న రోజుల్లో నీటి ఎద్దడి ఏర్పడే అవకాశం ఉన్నందున ప్రజలు నీటిని పొదుపుగా వినియోగించాలని ఎమ్మెల్యే సూచించారు. నీటి సమస్య తలెత్తకుండా అధికారులు ముందస్తు జాగ్రత్తలు తీసుకుంటూ అప్రమత్తంగా ఉండాలని ఆదేశించినట్లు తెలిపారు.
ఇందూరుకు చారిత్రక గుర్తింపుగా నిలిచిన పురాతన ఖిల్లా రామాలయ అభివృద్ధిలో భాగంగా రోప్‌వే ఏర్పాటు చేయనున్నట్లు ఎమ్మెల్యే వెల్లడించారు. ఇటీవల ఈ ప్రాజెక్టుకు సంబంధించి అధికారులు, కంపెనీ ప్రతినిధులు క్షేత్రస్థాయిలో పర్యటించి పరిశీలించినట్లు గుర్తుచేశారు.
ఈ కార్యక్రమంలో నగర మేయర్ కూరగాయల ఉమారాణి, 22వ డివిజన్ కార్పొరేటర్ వైష్ణవి సుధా, 25వ డివిజన్ కార్పొరేటర్ చింతకాయల రాజేందర్, 35వ డివిజన్ కార్పొరేటర్ ఎర్రం సుధీర్, బీజేపీ నాయకులు పవన్ ముందడ, శ్రీనివాస్, మార్వాడ్ కృష్ణ తదితరులు పాల్గొన్నారు.
