నందిపేటలో మార్మోగిన హరి కీర్తనలు…
త్రిశూల్ న్యూస్ రిపోర్టర్ మూన్ డిజైన్ శేఖర్
నందిపేట్ జులై 23 త్రిశూల్ న్యూస్: నందిపేట మండల కేంద్రంలో బుధవారం కంటేశ్వర్ ఇస్కాన్ టెంపుల్ వారి ఆధ్వర్యంలో జరిగిన జగన్నాత రథయాత్ర అంగరంగ వైభవంగా సాగింది. మధ్యాహ్నం 2 గంటలకు స్థానిక వివేకనంద విగ్రహం వద్ద నుండి సాగిన రథయాత్ర చాకలి ఐలమ్మ, అంబేద్కర్, నంది విగ్రహల మీదుగా బస్టాండ్ మెయిన్ రోడ్డు నుండి పాతూర్ లక్ష్మీనరసింహస్వామి టెంపుల్ శివాజీ , మంతన గల్లి సుభాష్ చంద్రబోస్, గాంధీ విగ్రహాల వద్దనుండి నాగమంతెన సంగం ఫంక్షన్ హాల్ వరకు సాగింది. అనంతరం ఫంక్షన్ హాల్ లో ప్రభుజి ప్రవచనాలు విని ఇస్కాన్ వారు నిర్వహించిన అన్న ప్రసాదాలను భక్తులు స్వీకరించారు. రథయాత్రలో డప్పు వాయిద్యాల, తమ్మళ్ళ భాగజాలతో, ఇస్కాన్ సంగీత వాయిద్యాల నడుమ ఆధ్యాత్మిక నృత్యాలు చేస్తూ చిన్న పెద్ద తేడా లేకుండా, చిన్నపిల్లల నుండి పండు ముసలి వరకు హరే రామ హరే కృష్ణ.. రామ రామ హరే కృష్ణ అంటూ నినాదాలు చేస్తూ… పరవశించిపోయారు. ఎటు చూసినా జనం.. ప్రభంజనం.. ఎటు విన్న హరే కృష్ణ నినాదం.. ఎవరి నుదుట చూసినా గోపీచందన తిలకం ధరించి చూడముచ్చటగా కనిపించారు, విద్యార్థుల సాంస్కృతిక నాటికలు, నాట్యాలు రథయాత్రలో ప్రత్యేక ఆకర్షణ గా మారాయి. ఢిల్లీ బృందావనం నుండి వచ్చిన సంకీర్తన భక్తులు అలుపెరుగకుండా పాటలు పాడుతూ భక్తులను ఉర్రూతలూగించారు. ముఖ్య అతిథులుగా కేదారేశ్వర ఆశ్రమ వ్యవస్థాపకులు కేదార్నంద రాములు మహారాజ్ , కంటేశ్వర్ ఇస్కాన్ రామానంద రాయ్ ప్రభుజీ లు పాల్గొన్నారు. ఈ సందర్భంగా రామానంద రాయ్ ప్రభుజి మాట్లాడుతూ…. నందిపేట మండల కేంద్రంలో ఈ జగన్నాథ రథయాత్రకు ఇంత పెద్ద ఎత్తున భక్తులు రావడ ఉందని, ప్రతి ఒక్కరూ హరి కీర్తనలు చేస్తూ, తన్మయంతో నాట్యమాడుతూ.. ఆ జగన్నాథ రథాన్ని తమ కరకములచే లగడం అదృష్టం గా భావించి ఐదు అడుగులైనా ఈ రథాన్ని లాగాలనే ఉద్దేశంతో ముందుకొచ్చి పాల్గొనడం నాకు చాలా సంతోషాన్ని కలిగించిందని, ప్రతి ఒక్కరికి ఆధ్యాత్మిక చింతన తప్పనిసరి అని, ఒక మనిషి తనువు అలసట ఎలా తీర్చుకుంటాడో… అదే మనిషికి మానసిక ఆనందం కూడా ఎంతో అవసరమని ఆ మానసిక ఆనందం ఒక్క దైవచింతనతోనే సాధ్యమని… అది హరే రామ హరే కృష్ణ నినాదాలతో.. సంకీర్తనలు చేస్తేనే సిద్ధిస్తుందని తెలిపారు. ఇక్కడి ప్రజలందరికీ, కృష్ణ భక్తులకు, రథయాత్రకు సహకరించిన ప్రజా ప్రతినిధులకు, అధికారులకు అనధికారులకు, ముఖ్యంగా యువతకు, మహిళలకు, చిన్నపిల్లలకు సైతం పేరుపేరునా ప్రతి ఒక్కరికి నా ధన్యవాదాలు అని తెలిపారు.
