ఆశయాలు అజరామరం.. భగత్ సింగ్ జయంతి వేడుకలు…
త్రిశూల్ న్యూస్ రిపోర్టర్ ప్రభాకర్
స్వరాజ్య సాధన కోసం చిరుప్రాయంలోనే ప్రాణత్యాగం చేసిన ఉద్యమ యోధుడు భగత్ సింగ్ 119వ జయంతి వేడుకలను తెలంగాణ యూనివర్సిటీ ఎన్‌ఎస్‌ఎస్ యూనిట్–1 ఆధ్వర్యంలో నిర్వహించారు. ఎన్‌ఎస్‌ఎస్ యూనిట్–1 ప్రోగ్రాం ఆఫీసర్ డాక్టర్ సీహెచ్ శ్రీనివాస్ ఆధ్వర్యంలో ఈ కార్యక్రమం జరిగింది.
ఈ కార్యక్రమానికి ముఖ్యఅతిథిగా హాజరైన తెలంగాణ యూనివర్సిటీ టీచర్స్ అసోసియేషన్ అధ్యక్షుడు డాక్టర్ పున్నయ్య మాట్లాడుతూ.. మనుషులను చంపగలం కానీ వారి ఆశయాలను ఎన్నటికీ చంపలేమని అన్నారు. అందుకే భగత్ సింగ్ నేటికీ తన ఆశయాల ద్వారా ప్రజల్లో సజీవంగా ఉన్నారని పేర్కొన్నారు.
భగత్ సింగ్ ధైర్యం, ఆత్మవిశ్వాసం, ఆలోచనా విధానం నేటి తరాలకు స్ఫూర్తిగా నిలవాలని పిలుపునిచ్చారు. మత సామరస్యం, శాంతియుత సహజీవనం, సమానత్వం, సామాజిక న్యాయానికి భగత్ సింగ్ ప్రతీకగా నిలిచారని తెలిపారు.
ఈ కార్యక్రమంలో తెలంగాణ యూనివర్సిటీ ప్రజా సంబంధాల అధికారి డాక్టర్ కె.వి. రమణాచారి, పబ్లిక్ అడ్మినిస్ట్రేషన్ విభాగాధిపతి డాక్టర్ పాత నాగరాజు, యూనివర్సిటీ కళాశాల సూపరింటెండెంట్ ఉమారాణి, ఎన్‌ఎస్‌ఎస్ యూనిట్–3 ప్రోగ్రాం అధికారి డాక్టర్ స్వామిరావు, ఎన్‌ఎస్‌ఎస్ వాలంటీర్లు, విద్యార్థులు పాల్గొన్నారు.
