తలసేమియా చిన్నారుల కోసం రక్తదాన శిబిరం.. 28 యూనిట్ల రక్తం సేకరణ
రక్తదాన శిబిరం నిర్వహించడం అభినందనీయం: దోమకొండ ఎస్సై ప్రభాకర్, డాక్టర్ బాలు…
త్రిశూల్ న్యూస్ రిపోర్టర్ గడిల లింగం
దోమకొండ: తలసేమియా వ్యాధితో బాధపడుతున్న చిన్నారుల కోసం రక్తదాన శిబిరాన్ని ఏర్పాటు చేయడం అభినందనీయమని దోమకొండ ఎస్సై ప్రభాకర్, ఇంటర్నేషనల్ వైశ్య ఫెడరేషన్ (ఐవీఎఫ్) సేవాదళ్ రాష్ట్ర చైర్మన్, రెడ్‌క్రాస్ జిల్లా సమన్వయ సభ్యులు డాక్టర్ బాలు అన్నారు. కామారెడ్డి జిల్లా దోమకొండ మండల కేంద్రంలో ఉగాది సిండికేట్, పద్మశాలి సంఘం ఆధ్వర్యంలో నిర్వహించిన రక్తదాన శిబిరంలో 28 యూనిట్ల రక్తాన్ని సేకరించారు.
ఈ కార్యక్రమానికి ముఖ్య అతిథులుగా హాజరైన ఎస్సై ప్రభాకర్, డాక్టర్ బాలు రక్తదాతలను అభినందించారు. ప్రతి సంవత్సరం రక్తదాన శిబిరాలను నిర్వహిస్తూ సేవా కార్యక్రమాల్లో ముందుంటున్న బాలె సురేందర్, మ్యాక నాగరాజులను వారు ప్రత్యేకంగా అభినందించి సన్మానించారు.
ఈ సందర్భంగా డాక్టర్ బాలు మాట్లాడుతూ.. తెలంగాణ రాష్ట్రవ్యాప్తంగా 7 వేల మందికి పైగా చిన్నారులు తలసేమియా వ్యాధితో బాధపడుతున్నారని తెలిపారు. ఈ వ్యాధితో బాధపడుతున్న చిన్నారులకు ప్రతి 15 రోజులకు ఒకసారి రక్తం అవసరమవుతుందని, వారి జీవితాలను కాపాడేందుకు యువత రక్తదాన శిబిరాల నిర్వహణకు ముందుకు రావాలని పిలుపునిచ్చారు.
రక్తదాన శిబిరాల నిర్వహణకు అవసరమైన పూర్తి సహాయ సహకారాలను కామారెడ్డి రక్తదాతల సమూహం, ఇంటర్నేషనల్ వైశ్య ఫెడరేషన్ (ఐవీఎఫ్), ఇండియన్ రెడ్‌క్రాస్ సొసైటీల ఆధ్వర్యంలో అందించేందుకు సిద్ధంగా ఉన్నామని పేర్కొన్నారు. రాబోయే రోజుల్లో రాష్ట్రవ్యాప్తంగా మరిన్ని రక్తదాన శిబిరాలను నిర్వహించి తలసేమియా చిన్నారుల ప్రాణాలను కాపాడేందుకు కృషి చేస్తామని తెలిపారు.
రక్తానికి ప్రత్యామ్నాయం లేదు
రక్తానికి ప్రత్యామ్నాయం లేదని, ప్రతి ఒక్కరూ మానవతా దృక్పథంతో ముందుకు వచ్చి రక్తదానం చేయాలని డాక్టర్ బాలు కోరారు. సకాలంలో రక్తాన్ని అందించడం ద్వారా ఎంతోమంది ప్రాణాలను కాపాడవచ్చని అన్నారు. శిబిరంలో రక్తదానం చేసిన దాతలకు ప్రశంసాపత్రాలు, స్టీల్ వాటర్ బాటిళ్లను అందజేశారు.
ఈ కార్యక్రమంలో పద్మశాలి సంఘం మండల అధ్యక్షుడు అందె గణేశ్, బ్లడ్ బ్యాంక్ సిబ్బంది బట్టు భరద్వాజ్, డాక్టర్ అజయ్, టెక్నీషియన్లు సతీశ్, గౌతమ్, భారత్ తదితరులు పాల్గొన్నారు.
