విద్యాభివృద్ధికి స్వచ్ఛంద సంస్థల సహకారం అభినందనీయం!
రూ.28 లక్షల వ్యయంతో నూతన పాఠశాల భవనం నిర్మాణం.. ప్రారంభించిన మున్సిపల్ చైర్‌పర్సన్ ఇప్ప ఉమారాణి శ్రీనివాస్…
త్రిశూల్ న్యూస్ రిపోర్టర్ గడిల లింగం
కామారెడ్డి: విద్యారంగ అభివృద్ధికి స్వచ్ఛంద సంస్థలు అందిస్తున్న సహకారం అభినందనీయమని కామారెడ్డి మున్సిపల్ చైర్‌పర్సన్ ఇప్ప ఉమారాణి శ్రీనివాస్ అన్నారు.
కామారెడ్డి మున్సిపాలిటీ పరిధిలోని 35వ వార్డులో భారతి ఆధ్వర్యంలోని భారతి చారిటబుల్ ట్రస్ట్ సుమారు రూ.28 లక్షల వ్యయంతో నిర్మించిన నూతన మండల పరిషత్ ప్రాథమిక పాఠశాల భవనాన్ని మున్సిపల్ చైర్‌పర్సన్ ఇప్ప ఉమారాణి శ్రీనివాస్ ప్రారంభించారు.
ఈ సందర్భంగా ఆమె విద్యార్థులకు శుభాకాంక్షలు తెలిపారు. విద్యారంగ అభివృద్ధికి ప్రైవేటు, స్వచ్ఛంద సంస్థలు ముందుకు వచ్చి తమ వంతు సహకారం అందించడం అభినందనీయమన్నారు. విద్యార్థులకు మెరుగైన మౌలిక వసతులు కల్పించేలా పాఠశాల భవనాన్ని నిర్మించిన భారతి చారిటబుల్ ట్రస్ట్ ప్రతినిధులకు ప్రత్యేక కృతజ్ఞతలు తెలిపారు.
ప్రతి విద్యార్థికి నాణ్యమైన విద్యతో పాటు మెరుగైన వసతులు కల్పించినప్పుడే సమాజ అభివృద్ధి సాధ్యమవుతుందని పేర్కొన్నారు. విద్యార్థుల ఉజ్వల భవిష్యత్తు కోసం విద్యారంగ అభివృద్ధికి ప్రతి ఒక్కరూ సహకరించాలని సూచించారు.
ఈ కార్యక్రమంలో వైస్ చైర్‌పర్సన్ కాసర్ల గోదావరి, కమిషనర్ పర్వతాలు, కౌన్సిలర్లు వినోద్, రాజు పాటిల్, మాధవి, టీపీవో దేవరాజు, డీఈవో మల్లికార్జున, స్థానిక ప్రజాప్రతినిధులు, విద్యాశాఖ అధికారులు, ఉపాధ్యాయులు, విద్యార్థులు, ట్రస్ట్ ప్రతినిధులు, స్థానిక నాయకులు తదితరులు పాల్గొన్నారు.
