ఒకే కుటుంబంలో 85 మంది సభ్యులు.. రోజుకు 80 కిలోల బియ్యం.. ఆదివారం 30 కిలోల మటన్..! అనంతపురం ఉమ్మడి కుటుంబం దేశానికే ఆదర్శం…
అనంతపురం జిల్లా: ఉమ్మడి కుటుంబాలు కనుమరుగవుతున్న ఈ రోజుల్లో, అనంతపురం జిల్లా కళ్యాణదుర్గం మండలం కుర్లపల్లి గ్రామానికి చెందిన కురుబ నాగప్ప కుటుంబం అందరికీ ఆదర్శంగా నిలుస్తోంది. ఆరు తరాలుగా ఒకే కుటుంబానికి చెందిన 85 మంది సభ్యులు కలిసిమెలిసి జీవిస్తూ ఉమ్మడి కుటుంబ వ్యవస్థ గొప్పతనాన్ని చాటుతున్నారు.
ఈ కుటుంబంలో ఆరుగురు అత్తలు, 14 మంది కోడళ్లు, పిల్లలు, మనవలు, మునిమనవలు కలిసి ఒకే కుటుంబంగా జీవిస్తున్నారు. సభ్యులకు వేర్వేరు ఇళ్లు ఉన్నప్పటికీ, వంట మాత్రం ఒకే వంటగదిలో జరుగుతుంది. ప్రతిరోజూ కుటుంబ సభ్యులందరికీ సరిపడేలా 80 కిలోల బియ్యం వండుతారు. ఆదివారాల్లో 30 కిలోల మటన్ లేదా చికెన్ వండి అందరూ కలిసి భోజనం చేస్తారు. ఉదయం 5 గంటల నుంచి రాత్రి 9 గంటల వరకు వంటగదిలో పనులు కొనసాగుతుంటాయి.
ఈ కుటుంబంలో సుమారు 25 మంది విద్యార్థులు ఉన్నారు. కుటుంబానికి మొత్తం 127 ఎకరాల వ్యవసాయ భూమి ఉంది. అంతేకాకుండా 70 గేదెలు, 40 ఆవులు, వెయ్యికి పైగా గొర్రెలు, మేకలు ఉన్నాయి. వ్యవసాయం, పాడి పరిశ్రమ, పశుపోషణతో పాటు నాలుగు ప్రైవేట్ బస్సులు నిర్వహిస్తూ కుటుంబ ఆదాయాన్ని పెంచుకుంటున్నారు.
వ్యవసాయం ద్వారా పండించిన ధాన్యం, కూరగాయలను కుటుంబ అవసరాలకు వినియోగించి, మిగిలిన వాటిని మార్కెట్‌లో విక్రయిస్తున్నారు. అలాగే ఇతర ఆదాయ వనరుల ద్వారా వచ్చే మొత్తాన్ని కూడా కుటుంబ అవసరాలకే వినియోగిస్తున్నారు.
ఈ ఉమ్మడి కుటుంబం సుమారు 60 సంవత్సరాల క్రితం తీసుకున్న ఒక నిర్ణయం వల్లే కొనసాగుతోంది. కుటుంబ పెద్దలు హనుమంతరాయుడు మరియు ముత్యాలప్ప కలిసి “ఎలాంటి పరిస్థితుల్లోనైనా కలిసే ఉండాలి” అనే నిర్ణయం తీసుకోవడంతో ఆ సంప్రదాయం ఇప్పటికీ కొనసాగుతోంది.
ఈ కుటుంబంలో రూ.1,000 దాటిన ప్రతి ఖర్చు కూడా కుటుంబ పెద్దల అనుమతితోనే జరుగుతుంది. పరస్పర గౌరవం, ఐక్యత, సహకారం, క్రమశిక్షణతో జీవిస్తున్న ఈ కుటుంబం నేటి సమాజానికి ఉమ్మడి కుటుంబ వ్యవస్థ ఎంత గొప్పదో చాటి చెబుతోంది.
