నిజామాబాద్ అభివృద్ధికి ప్రత్యేక నిధులు కేటాయించాలి
రాజకీయాలకు అతీతంగా అభివృద్ధికి సహకరించాలి.. రాష్ట్ర ప్రభుత్వానికి ఎమ్మెల్యే ధన్పాల్ విజ్ఞప్తి…
ఇందూరు: నిజామాబాద్ నగరంలో అభివృద్ధి పనులు మరింత వేగవంతం కావాలంటే రాష్ట్ర ప్రభుత్వం అవసరమైన నిధులు విడుదల చేసి సహకరించాలని అర్బన్ ఎమ్మెల్యే ధన్పాల్ సూర్యనారాయణ అన్నారు.
నగరంలోని 42వ డివిజన్ పరిధిలో గల చంద్రశేఖర్ నగర్ కాలనీలో సీసీ రోడ్డు నిర్మాణ పనులకు ఎమ్మెల్యే భూమిపూజ చేశారు.
ఈ సందర్భంగా ఆయన మాట్లాడుతూ.. నియోజకవర్గ అభివృద్ధికి స్పెషల్ ఫండ్స్ విడుదల చేస్తే మరిన్ని అభివృద్ధి పనులు చేపట్టేందుకు అవకాశం ఉంటుందని తెలిపారు. రాజకీయాలకు అతీతంగా ప్రజా సంక్షేమం, అభివృద్ధే లక్ష్యంగా ప్రతి ఒక్కరూ పనిచేయాలని సూచించారు. తన ప్రధాన లక్ష్యం కూడా నియోజకవర్గాన్ని అభివృద్ధి పథంలో ముందుకు తీసుకెళ్లడమేనని స్పష్టం చేశారు.
గత కౌన్సిల్ సమావేశంలో విడుదల చేసిన రూ.20 లక్షల నిధులతో నగరంలోని పలు కాలనీల్లో రోడ్లు, డ్రైనేజీలు, కల్వర్టులతో పాటు ఇతర అభివృద్ధి పనులు ప్రారంభమయ్యాయని వెల్లడించారు. రానున్న కౌన్సిల్ సమావేశంలోనూ మరిన్ని నిధులు కేటాయించాలని కోరారు.
ప్రత్యేకంగా నిజామాబాద్ అర్బన్ నియోజకవర్గానికి చెందిన పీసీసీ అధ్యక్షుడు మహేష్ కుమార్ గౌడ్ నియోజకవర్గ అభివృద్ధిపై ప్రత్యేక దృష్టి సారించి, స్పెషల్ ఫండ్స్ విడుదలయ్యేలా కృషి చేయాలని ఎమ్మెల్యే విజ్ఞప్తి చేశారు. ఈ విషయాన్ని ఇప్పటికే పలుమార్లు రాష్ట్ర ప్రభుత్వ దృష్టికి తీసుకెళ్లినట్లు గుర్తుచేశారు.
ఈ కార్యక్రమంలో మేయర్ ఉమారాణి, కార్పొరేటర్లు బెల్లాల్ శశాంక్, పసునూరి రాము, మఠం పవన్, బీజేపీ మండల అధ్యక్షుడు ఆనంద్ రావు తదితరులు పాల్గొన్నారు.
























