హోన్నాజిపేట్‌లో పంటల వైవిధ్యీకరణపై శిక్షణ కార్యక్రమం
పప్పుధాన్యాలు, చిరుధాన్యాలు, నూనెగింజల సాగుపై రైతులకు అవగాహన…
త్రిశూల్ న్యూస్ ధర్పల్లీ మండల్ రిపోర్టర్ బిల్ల నవీన్
ధర్పల్లి: నిజామాబాద్ జిల్లా ధర్పల్లి మండలంలోని హోన్నాజిపేట్ రైతు వేదికలో పంటల వైవిధ్యీకరణలో భాగంగా పప్పుధాన్యాలు, చిరుధాన్యాలు, నూనెగింజల సాగుపై ఆర్‌పీఎల్ ఆధారిత శిక్షణ కార్యక్రమాన్ని నిర్వహించారు.
ఈ సందర్భంగా వ్యవసాయ అధికారులు రైతులకు పంటల వైవిధ్యీకరణ ప్రాముఖ్యతను వివరించారు. వరి పంటపై అధికంగా ఆధారపడకుండా, స్థానిక వాతావరణ పరిస్థితులు, భూగర్భ జలాల లభ్యత, నేల స్వభావానికి అనుగుణంగా పప్పుధాన్యాలు, చిరుధాన్యాలు, నూనెగింజల పంటలను సాగు చేయాలని సూచించారు.
ప్రస్తుత వాతావరణ పరిస్థితులు, ఎల్‌నినో ప్రభావంతో అధిక ఉష్ణోగ్రతలు నమోదయ్యే అవకాశం, భూగర్భ జలాల కొరత వంటి అంశాలను దృష్టిలో ఉంచుకొని రైతులు పంటల మార్పిడితో పాటు ప్రత్యామ్నాయ పంటల సాగుపై దృష్టి సారించాలని అధికారులు తెలిపారు. పంటల వైవిధ్యీకరణ ద్వారా సాగు ఖర్చులు, నీటి వినియోగాన్ని తగ్గించడంతో పాటు వ్యవసాయంలో నష్టాలను అధిగమించే అవకాశాలు ఉంటాయని వివరించారు.
ఈ కార్యక్రమంలో నిజామాబాద్ రూరల్ ఏడీఏ ఆంజి ప్రసాద్, వ్యవసాయ అధికారి వెంకటేష్, రైతులు తదితరులు పాల్గొన్నారు.
