గణేష్ నిమజ్జనంలో డీజేలకు అనుమతి ఇవ్వండి
-కేసీఆర్ పాటలంటే సర్కారుకెందుకంత భయం
-జనతా గ్యారేజ్ క్రైం నెం:- 31 కార్యక్రమంలో బీఆర్ఎస్ నేత, మాజీ ఎమ్మెల్యే జీవన్ రెడ్డి…
హైదరాబాద్, సెప్టెంబర్ 21:-గణేష్ నిమజ్జనం సందర్భంగా డీజే వాహనాలకు అనుమతులు ఇవ్వాలని బీఆర్ఎస్ నిజామాబాద్ జిల్లా అధ్యక్షుడు, ఆర్మూర్ మాజీ ఎమ్మెల్యే ఆశన్నగారి జీవన్ రెడ్డి హోంమంత్రి కూడా అయిన ముఖ్యమంత్రి రేవంత్ రెడ్డికి, డీజీపీ సీవీ ఆనంద్ కు విజ్ఞప్తిచేశారు.
జనతా గ్యారేజ్ క్రైం నెం:- 31 కార్యక్రమంలో జీవన్ రెడ్డి సోమవారం మాట్లాడుతూ
గణేష్ నిమజ్జనం సందర్భంగా డీజే వాహనాలకు పోలీసులు అనుమతులు ఇవ్వడం లేదంటూ తనకు సందేశాలు వస్తున్నాయన్నారు.
ఆంధ్రప్రదేశ్ లో మంత్రి నారా లోకేష్ విజ్ఞప్తి చేసిన వెంటనే ఆ రాష్ట్ర
హోంమంత్రి అనిత, డీజీపీ జోక్యం చేసుకుని ఎలాంటి ఇబ్బందులు లేకుండా డీజే వాహనాలకు అనుమతు లు మంజూరు చేసిన విషయాన్ని జీవన్ రెడ్డి గుర్తు చేశారు.
ఒక్క డీజే వాహనం కూడా సీజ్ చేయకూడదని పోలీసు శాఖకు లోకేష్ విజ్ఞప్తి చేశారన్నారు. అలాగే కాంగ్రెస్ పార్టీయే అధికారంలో ఉన్న కర్ణాటక రాష్ట్రంలో కూడా అనుమతులు ఇచ్చారని, మహారాష్ట్ర లో కూడా అక్కడి ఫడ్నవీస్ ప్రభుత్వం డీజే వాహనాలకు గ్రీన్ సిగ్నల్ ఇచ్చిందని ఆయన వివరించారు. అలాంటిది తెలంగాణ రాష్ట్రంలో డీజే వాహనాలకు ఎందుకు అనుమతి ఇవ్వడం లేదని ఆయన నిలదీశారు. కేవలం భక్తులు వాహనాలపై కేసీఆర్ పాటలు పెట్టుకొని డ్యాన్స్ లు చేస్తున్నారన్న అక్కసు తోనే డీజేలకు అనుమతులు నిరాకరిస్తున్నారని ఆయన మండిపడ్డారు. కేసీఆర్ పాటలంటే సర్కారుకెందుకంత భయం అని ఆయన ఎద్దేవా చేశారు. ఆర్మూర్ నుంచి అచ్చంపేట వరకూ గణేష్ నిమజ్జనంలో కేసీఆర్ పాటలే వినిపిస్తున్నాయన్నారు. ఇకనైనా సుప్రీంకోర్టు తీర్పుకు లోబడి పరిమితులకు అనుగుణంగా
గణేష్ నిమజ్జనం కార్యక్రమాలలో డీజేలకు అనుమతుల ప్రక్రియను సులభతరం చేయాలని జీవన్ రెడ్డి డిమాండ్ చేశారు.
