మోడల్ స్కూల్ ఉపాధ్యాయుల సమస్యలను ప్రభుత్వం వెంటనే పరిష్కరించాలి…
త్రిశూల్ న్యూస్ రిపోర్టర్ బిల్లా నవీన్…
ధర్పల్లి: మోడల్ స్కూల్ ఉపాధ్యాయుల దీర్ఘకాలిక సమస్యలను పరిష్కరించాలని డిమాండ్ చేస్తూ మోడల్ స్కూల్ టీచర్స్ యూనియన్ జాయింట్ యాక్షన్ కమిటీ ఆధ్వర్యంలో ధర్పల్లి మండలంలోని మోడల్ స్కూల్ ఉపాధ్యాయులు భోజన విరామ సమయంలో నల్ల బ్యాడ్జీలు ధరించి నిరసన తెలిపారు.
ఈ సందర్భంగా జాయింట్ యాక్షన్ కమిటీ జిల్లా అధ్యక్షుడు బి. నాగేశ్వరరావు మాట్లాడుతూ.. గత 13 ఏళ్లుగా మోడల్ స్కూల్ ఉపాధ్యాయులు అనేక సమస్యలను ఎదుర్కొంటున్నారని తెలిపారు. ముఖ్యంగా జీవో 4317 అమలు చేయకపోవడం, 010 పద్దు ద్వారా వేతనాలు చెల్లించడం, పీజీటీలకు జూనియర్ లెక్చరర్లుగా పదోన్నతులు కల్పించడం, కారుణ్య నియామకాలు చేపట్టడం, టీజీటీలకు నోషనల్ సర్వీస్ కల్పించడం, పదోన్నతులు కల్పించడం, ఖాళీ పోస్టులను భర్తీ చేయడం వంటి సమస్యలను ప్రభుత్వం వెంటనే పరిష్కరించాలని కోరారు.
ఉపాధ్యాయుల న్యాయమైన డిమాండ్లను ప్రభుత్వం తక్షణమే పరిష్కరించాలని ఆయన విజ్ఞప్తి చేశారు. ఈ నిరసన కార్యక్రమాలు అక్టోబర్ 30 నుంచి నవంబర్ 17వ తేదీ వరకు వివిధ రూపాల్లో కొనసాగనున్నాయని తెలిపారు.
ఈ కార్యక్రమంలో ఉపాధ్యాయులు సాయిలు, లక్ష్మీనరసయ్య, శారద, సంతోష్ కుమార్, డానియల్ తదితరులు పాల్గొన్నారు.
