తెలంగాణ యూనివర్సిటీలో ప్రపంచ ఓజోన్ దినోత్సవం..
త్రిశూల్ న్యూస్ రిపోర్టర్ ప్రభాకర్
నిజామాబాద్: తెలంగాణ యూనివర్సిటీ జాతీయ సేవా పథకం (ఎన్ఎస్ఎస్) యూనిట్–2 ఆధ్వర్యంలో ప్రపంచ ఓజోన్ దినోత్సవం–2026ను బుధవారం నిర్వహించారు. ఈ సందర్భంగా “గ్లోబల్ యాక్షన్ ఫర్ ఎ కూలర్ ప్లానెట్ – సెలబ్రేటింగ్ 10 ఇయర్స్ ఆఫ్ సస్టైనబుల్ కూలింగ్ అండర్ ది కిగాలి అమెండ్మెంట్ టు ది మాంట్రియల్ ప్రోటోకాల్” అనే ఇతివృత్తంపై అవగాహన కార్యక్రమం నిర్వహించారు.
ఈ సందర్భంగా ఎన్ఎస్ఎస్ వాలంటీర్లు ఓజోన్ పొర పరిరక్షణ, పర్యావరణ సమతుల్యత, వాతావరణ మార్పుల నియంత్రణలో ప్రతి ఒక్కరి బాధ్యతపై అవగాహన కల్పించారు. ముఖ్యంగా హైడ్రోఫ్లోరోకార్బన్స్ (HFCs) వినియోగాన్ని దశలవారీగా తగ్గించడం, శీతలీకరణ రంగంలో ఇంధన సామర్థ్యాన్ని పెంపొందించడం, ఓజోన్ పొర పునరుద్ధరణకు అంతర్జాతీయ సహకారాన్ని కొనసాగించడం వంటి అంశాలపై చర్చించారు.
ఓజోన్ పొర పరిరక్షణ బాధ్యతను ముఖ్యంగా విద్యార్థులు తమ భుజాలపై వేసుకుని, భావితరాలకు ఆరోగ్యకరమైన భవిష్యత్తును అందించేందుకు కృషి చేయాలని ఎన్ఎస్ఎస్ వాలంటీర్లు పిలుపునిచ్చారు.
ఈ కార్యక్రమంలో ఎన్ఎస్ఎస్ యూనిట్–2 ప్రోగ్రామ్ ఆఫీసర్ డా. అహ్మద్ అబ్దుల్ హలీమ్ ఖాన్, ప్రొఫెసర్ ఎం. అరుణ, ప్రొఫెసర్ బి. విద్యా వర్ధిని, డా. ఎ. మహేందర్, డా. కె. కిరణ్మయి, డా. జావెరియా ఉజ్మా, డా. ఎం. ప్రసన్న శీలా, డా. డి. శ్రీనివాస్, డా. వి. జలందర్, డా. డి. ప్రసన్న తదితరులు పాల్గొన్నారు.
