ముచ్కూర్–బెజ్జోర రోడ్డుపై నరకప్రాయం ప్రమాదాలకు నిలయంగా మారిన ప్రధాన రహదారి…
త్రిశూల్ న్యూస్ రిపోర్టర్ కూనే జితేందర్
భీమ్‌గల్ మండలంలోని ముచ్కూర్–బెజ్జోర ప్రధాన రహదారి దయనీయ స్థితికి చేరుకుంది. రహదారి అంతటా భారీ గుంతలు ఏర్పడటంతో పాటు, వ్యవసాయ పైపులైన్‌ల ఏర్పాటు కోసం తవ్విన గోతులను సక్రమంగా పూడ్చకపోవడంతో వాహనదారులు తీవ్ర ఇబ్బందులు ఎదుర్కొంటున్నారు.
గుంతలను తప్పించుకునే ప్రయత్నంలో ద్విచక్ర వాహనదారులు అదుపుతప్పి కిందపడుతున్న ఘటనలు తరచూ చోటుచేసుకుంటున్నాయని స్థానికులు తెలిపారు. రాత్రి వేళల్లో ఈ రహదారిపై ప్రయాణించడం మరింత ప్రమాదకరంగా మారిందని ఆవేదన వ్యక్తం చేస్తున్నారు.
ప్రతిరోజూ ఈ రహదారిపై విద్యార్థులు, రైతులు, ఉద్యోగులు, గ్రామస్థులు రాకపోకలు సాగిస్తున్నప్పటికీ, రోడ్డు మరమ్మతుల విషయంలో సంబంధిత అధికారులు నిర్లక్ష్యం వహిస్తున్నారని స్థానికులు ఆరోపిస్తున్నారు.
ఇప్పటికైనా ప్రజాప్రతినిధులు, సంబంధిత అధికారులు స్పందించి రహదారికి తక్షణమే మరమ్మతులు చేపట్టి, గుంతలను పూడ్చి ప్రయాణికులకు సురక్షితమైన రాకపోకలు కల్పించాలని వాహనదారులు, గ్రామస్థులు విజ్ఞప్తి చేస్తున్నారు.
